Hesablama Palatası tərəfindən Prezident yanında Elmin İnkişafi Fondunun gəlir və xərclərinin icrasi üzrə uyğunluq auditinin nəticələrinə dair auditor hesabatı açıqlanıb.



Xəbər verilir ki, audit sübutlarının əldə edilməsi zamanı predmet məsələlər üzrə ayrılan dövlət vəsaitlərinin hərəkətini, bu vəsaitlərlə həyata keçirilən maliyyə-təsərrüfat əməliyyatlarını, ümumilikdə dövlət vəsaitlərinin idarə edilməsini və icrasını əks etdirən sənədlər araşdırılıb, audit qrupu tərəfindən tərtib olunan hesabat və ona əlavələr təhlil edilib, həmçinin həmin hesabatla bağlı Fondun 30 iyun 2021-ci il tarixli məktubu diqqətə alınıb.



Əhəmiyyətli uyğunsuzluqların dəyər və kəmiyyət ölçülərini əhatə edən məbləğlərin həcmi və əhəmiyyəti, uyğunsuzluğun mahiyyəti, uyğunsuzluq ilə nəticələnmənin səbəbi, uyğunsuzluğun yaranmasına təsir edən və digər amillər təhlil edilib.



Özünümaliyyələşdirmə prinsipinin tətbiqi ilə bağlı fəaliyyətin başa çatdırılmaması Fonda ayrılmış vəsaitlərin vaxtında və nəzərdə tutulmuş məqsədlər üçün istifadə edilməməsi ilə nəticələnib, eyni zamanda mövcud imkanlardan istifadə olunmayaraq, qalib layihələrin maliyyələşdirilməsi təmin edilməyib.



Auditin əhatə etdiyi dövrdə Fondun təsdiq edilmiş ştat cədvəlində baş məsləhətçi, aparıcı məsləhətçi və məsləhətçi vəzifələrinə uyğun 7 işçi fəaliyyət göstərdiyi halda, həmin inzibati vəzifələr üzrə ştatdankənar işçilərin sayı 8 olub.



Ümumilikdə bütün ştatdankənar işçilərə 2019-cu ildə cəmi 59527,9 manat, o cümlədən 53441,3 manat əməkhaqqı, 6086,6 manat məzuniyyət haqqı, 2020-ci ildə cəmi 86702,6 manat, o cümlədən 79763,4 manat əməkhaqqı, 6939,2 manat məzuniyyət haqqı olmaqla, ümumilikdə 146230,5 manat vəsait istifadə edilib. Fond tərəfindən müsabiqələr dövlət sifarişinin istiqamətləri üzrə uyğun şəkildə elan olunmamış, ümumilikdə layihələr 7 istiqamətdən yalnız 2-ni əhatə edib. Layihələrin həyata keçirilməsi üçün nəzərdə tutulmuş avadanlıq və cihazlar alınmadan layihələrin başa çatdırılmış hesab edilməsi həmin layihələrin ilkin məqsəd və nəticələrə nail olunmasında riskləri formalaşdırıb. Qeyri-maliyyə aktivlərinin uçota alınması ilə bağlı fəaliyyətin reqlamentləşdirilməməsi hesabatlılığın təmin edilməməsi ilə nəticələnib.



Nəqliyyat vasitələrinin saxlanması ilə bağlı vəsaitlərin istifadəsində müəyyən edilmiş normalara riayət edilməməsi səbəbindən büdcə vəsaitinin artıq istifadə edilməsinə şərait yaranıb. Auditin əhatə etdiyi dövr ərzində aparılmış xərclər üzrə satınalma predmeti olan bir halda vəsaitlər qanunvericiliklə müəyyən edilmiş metodlar tətbiq olunmadan istifadə edilib. Fondun maliyyə hesabatlarının tərtibi zamanı əhəmiyyətli olmayan təhriflərə yol verilmiş, minik avtomobilləri üzrə amortizasiya normaları düzgün tətbiq edilməyib. Fondun yeni rəhbərliyi təyin edilənədək nəzarət mühitinin formalaşmasında yaranmış boşluqlar funksional fəaliyyətin təmin edilməsini çətinləşdirmiş, hesabatvermə mexanizmləri tətbiq edilməyib.