İlqar İlyasov

YAP Laçın rayon təşkilatının sədri

Azərbaycan Prezidenti İlham Əliyevin 9 aprel 2025-ci ildə ADA Universitetində keçirilən "Yeni dünya nizamına doğru" mövzusunda beynəlxalq forumda etdiyi çıxış, qlobal dəyişikliklər və Azərbaycanın bu prosesdəki rolu barədə əhəmiyyətli məqamları əhatə edir.

Prezident İlham Əliyev çıxışında, müasir dövrdə dünya nizamının köklü dəyişikliklərə uğradığını və beynəlxalq münasibətlərin yeni qaydalar çərçivəsində tənzimlənməsinin zəruriliyini vurğuladı. O, artıq İkinci Dünya Müharibəsindən sonra formalaşmış beynəlxalq sistemin keçmişdə qaldığını və yeni çoxqütblü dünya düzəninin formalaşması prosesinin başladığını qeyd etdi.

Azərbaycanın bu yeni dünya nizamında fəal iştirak etməsinin vacibliyini qeyd edən dövlət başçısı, ölkəmizin Cənubi Qafqaz və Xəzər regionundakı strateji mövqeyini önə çəkdi. Azərbaycanın müasir infrastruktur, siyasi sabitlik və dünyaya açıq siyasəti ilə bu prosesdə mühüm rol oynadığını bildirdi.

Prezident İlham Əliyev, regional əməkdaşlığın və sülhün təmin olunmasında Azərbaycanın təşəbbüslərindən bəhs etdi. O, Ermənistanla münasibətlərin normallaşması istiqamətində atılan addımları və sərhəd komissiyasının ilk iclasının keçirilməsini müsbət inkişaf kimi qiymətləndirdi. Eyni zamanda, kommunikasiyaların açılması və Zəngəzur dəhlizinin reallaşdırılması məsələlərinin vacibliyini vurğuladı.

Çıxışında, qlobal təhlükəsizlik məsələlərinə də toxunan Prezident, münaqişələrin və humanitar böhranların artmasından narahatlığını ifadə etdi. Ədalətli və çoxqütblü bir dünya nizamının qurulmasının vacibliyini və Azərbaycanın bu istiqamətdəki səylərini vurğuladı.

Ümumilikdə, Prezident İlham Əliyevin çıxışı, Azərbaycanın yeni dünya nizamında fəal və konstruktiv rol oynamağa davam edəcəyini və regional sülhün təmin olunmasında liderlik edəcəyini göstərdi.