Qarabağ Regional Təhsil İdarəsində ədalətsizlik və laqeydlik hökm sürür!

Mən, şəhid övladı Ülfət Qurbanov, Qarabağ Regional Təhsil İdarəsinin müdiri Sənan Mənsimlinin və Keyfiyyətə Nəzarət Sektorunun müdiri Anar Şəfiyevin fəaliyyəti ilə bağlı kəskin narazılığımı ictimaiyyətin diqqətinə çatdırıram.

Qarabağ bölgəsində yaşayan insanlar artıq illərdir ədalətsizlik və biganəliklə üz-üzə qalıblar. Təhsil idarəsinin rəhbərliyi vətəndaşlara, müəllimlərə, şagirdlərə sahib çıxmaq əvəzinə, onların müraciətlərini qulaq ardına vurur. Sakinlər haqsızlıqla, ayrı-seçkiliklə, süni maneələrlə üzləşir. Bu gün Qarabağda yaşayan sadə insanlar özlərini sahibsiz, kimsəsiz və unudulmuş hiss edirlər.

Sənan Mənsimlinin rəhbərliyi altında bölgədə normal iş mühiti deyil, qorxu və ədalətsizlik mühiti hökm sürür. İnsanların ehtiyacları və problemləri gözardı edilir. Təhsilin keyfiyyəti yüksəlmək əvəzinə daha da aşağı düşür. İdarə rəhbərləri özlərini xalqın xidmətçisi yox, sanki bölgənin “hakimi” kimi aparırlar.

Ən acınacaqlısı isə şəhid ailələrinin, qazilərin övladlarının, müəllimlərin və sadə vətəndaşların dərdinə laqeyd münasibətin göstərilməsidir. Bu torpaqlar uğrunda qanını tökənlərin övladlarına belə sahib çıxılmırsa, onda hansı ədalətdən, hansı insafdan danışmaq olar?

Cənab Nazir Emin Əmrullayev! Sizin rəhbərlik etdiyiniz Elm və Təhsil Nazirliyi bütün bu haqsızlıqlara göz yumurmu? Sizin təyin etdiyiniz rəhbərlərin bölgədə yaratdığı narazılıqlara niyə reaksiya verilmir? Əgər mərkəzdən nəzarət yoxdursa, o zaman bölgədə kim xalqa sahib çıxacaq?

Qarabağ bölgəsinə rəhbər vəzifələrə gətirilən şəxslər xalqın problemlərini həll etməyə yox, vətəndaşları susdurmağa, narazı salmağa, öz şəxsi maraqlarını həyata keçirməyə yönəlirlər. Bu isə təkcə idarəetmədə məsuliyyətsizlik deyil, həm də xalqa açıq-aşkar hörmətsizlikdir.

Mən bir şəhid övladı olaraq tələb edirəm:

Qarabağ Regional Təhsil İdarəsində baş verən laqeydliyə son qoyulsun;

Sənan Mənsimlinin və Anar Şəfiyevin fəaliyyəti ciddi araşdırılsın;

Vətəndaşların, müəllimlərin, şagirdlərin, xüsusilə də şəhid ailələrinin səsi eşidilsin.


Haqsızlıq nə qədər gizlədilsə də, xalqın səsi susdurula bilməz! Qarabağ xalqı ədalət tələb edir, və bu ədalət gec-tez bərpa olunacaq!