Ukraynanın keçmiş müdafiə naziri Mixail Fedorov ölkədə seçkilərin keçirilməsinin vacibliyini vurğulayıb və müharibənin demokratiyanın qarşısını almaq üçün bəhanəyə çevrilməməli olduğunu bildirib.

Xəbər verilir ki, Fedorov bu barədə özünün “YouTube” kanalında yayımladığı videomüraciətdə danışıb.

Onun sözlərinə görə, dövlət hərbçilərin, xaricdə yaşayan milyonlarla ukraynalının, eləcə də cəbhəyanı ərazilərdə yaşayan vətəndaşların səsvermədə iştirakını təmin etməlidir.

Eks-nazir bildirib ki, demokratiya Rusiyanın girovuna çevrilə bilməz.

"Biz məhz azad Avropa dövləti olaraq qalmaq istədiyimiz üçün müharibə aparırıq”, – deyə keçmiş nazir bildirib.

O, ölkənin və demokratiyanın gələcəyi ilə bağlı daha geniş müzakirələrin aparılmasına çağırıb.

Keçmiş nazir istefasına qarşı artıq bir aydır davam edən etirazlara da münasibət bildirib.

“İnsanlar qərarların niyə qəbul edildiyini anlamadıqları bir dövlətdə sonsuzadək yaşaya bilməzlər. Niyə bəzi islahatlar irəliləyir, digərləri isə bloklanır? Cəbhədə bu gün zəruri olan qərarlar niyə aylarla kabinetlərdə dolaşır?”, – Fedorov qeyd edib.

Qeyd edək ki, Mixail Fedorov iyulun 31-də müharibə dövründə Prezident Vladimir Zelenskiyə qarşı siyasi müxalifətdə olmayacağını açıqlayıb. Bununla belə, o, müdafiə naziri vəzifəsi istisna olmaqla, hökumətə qayıtmağa razı olmayacağını bildirib.