27 Sentyabr Anım Günündə müqəddəs şəhidlərimizin əziz xatirəsi ehtiramla yad edilmişdir.
Ölkə Prezidenti cənab İlham Əliyevin 2020-ci il 2 dekabr tarixli Sərəncamına əsasən hər il sentyabrın 27-si Anım Günü kimi qeyd edilir. Bu gün Vətən uğrunda canından keçmiş bütün qəhrəmanların müqəddəs xatirəsinə xalqımızın dərin ehtiramının ifadəsidir.
Şəhidlərimizin canı və qanı bahasına əldə olunmuş Qələbə yalnız bu günün deyil, gələcək nəsillərin də məsuliyyətidir. Azad edilmiş torpaqlarımızda həyata keçirilən genişmiqyaslı bərpa və quruculuq işləri onların əziz xatirəsinə ucaldılan canlı abidədir. Bakıda inşa olunan Vətən Müharibəsi Memorial Kompleksi və Zəfər Muzeyi, həmçinin Zəfər parkı xalqımızın qəhrəmanlığını və şəhidlərin ölməzliyini təcəssüm etdirir. 27 sentyabr Anım Günü yalnız kədər günü deyil, həm də milli qürur, Vətən sevgisi və şəhidlərimizin müqəddəs xatirəsinə sədaqət günüdür. Bu gün Azərbaycan xalqının qəhrəmanlıq tarixinə yazılmış ən şanlı səhifədır. Şəhidlərin qanı bahasına bərpa edilmiş torpaqlarımızda dalğalanan üçrəngli bayraq xalqımızın milli iradəsinin, birliyinin və əzminin simvoludur.
Azərbaycan bu gün qalib xalqdır və bu qələbənin qorunması, əbədiləşdirilməsi hər birimizin vəzifəsidir. Şəhidlərin ruhu qarşısında borcumuz onların bizə miras qoyduğu azad və güclü Vətəni daim inkişaf etdirmək, gələcək nəsillərə qürurla ötürməkdir.
Artıq beşinci ildir ki, bütün şəhidlərimizə dərin ehtiram əlaməti olaraq 27 sentyabr ölkəmizdə Anım Günü kimi qeyd edilir.
Bununla əlaqədar Laçın Rayon İcra Hakimiyyətinin təşkilatçılığı ilə cari ilin 27 sentyabr - Anım Günü ilə əlaqədar laçınlı məcburi köçkünlərin müvəqqəti məskunladığı Ağcabədi rayonunun Taxta Körpü qəsəbəsində inşa olunmuş yeni parkda ümumrayon anım tədbiri keçirilmişdir. Təbirdə Laçın Rayon İcra Hakimiyyətinin başçısı Aqil Nəzərli, rayonun hüquq mühafizə orqanlarının rəhbərləri, şəhid ailələri, müharibə əlilləri, idarə, müəssisə və xidmət sahələrinin rəhbərləri, YAP fəalları və çoxsaylı ictimaiyyət nümayəndələri iştirak etmişlər.Anım tədbirində, Azərbaycan Respublikasının müstəqilliyi və ərazi bütövlüyü uğrunda canından keçən bütün şəhidlərimizin xatirəsi bir dəqiqəlik sükutla yad edilərək, ruhlarına dualar oxunmuş, xalqımızın qəhrəman övladları ilə daim qürur duyulduğu, qeyd olunaraq, Şəhidlərin Xatirə kompleksi önünə əklil qoyulmuş, tər qərənfillər düzülmüşdür.
Tədbirdə həmçinin, ölkə Prezidenti, Müzəffər Ali Baş Komandan cənab İlham Əliyevin rəhbərliyi altında 44 günlük Vətən müharibəsində, 2022-ci il sentyabrın 12-dən 13-nə keçən gecə, eləcədə 2023-cü ilin 18-19 sentyabrında Ermənistan silahlı qüvvələrinin törətdikləri genişmiqyaslı təxribatın qarşısı alınarkən şanlı tarix yazan qəhrəman oğullarımızın, şəhidlərimizin, qazilərimizin döyüş yolundan iftixar hissi ilə danışılaraq, onların hər birinin bir qəhrəman olduğu və bu gün hər kəsin onlarla fəxr etdiyi, qürur duyduğu bildirilmişdir.
Tədbirdə onların hər birinə yaşatdığı sonsuz Qələbə sevincinə görə Azərbaycan Respublikasının Prezidenti, Ali Baş Komandan cənab İlham Əliyevə və şanlı Ordumuza dərin minnətdarlıqlarını və təşəkkürlərini bildirən laçınlılar, dövlət başçısının siyasi qətiyyəti, diplomatik bacarığı, Silahlı Qüvvələrimizin qəhrəmanlığı və peşəkarlığı sayəsində Qarabağ bölgəsində həllini gözləyən məsələlərin nəzərdə tutulduğu kimi yerinə yetiriləcəyinə, ölkəmizin suverenliyinin əbədi olaraq təmin ediləcəyinə əminliklərini ifadə etmişlər.
Laçın Rayon İcra Hakimiyyətinin başçısı Aqil Nəzərli şəhid ailələri və qazilərlə görüşərək, onların qayğı və problemləri ilə maraqlanmışdır. Bütün tədbirlərdə iştirak etmələrindən mənmunluq hissi keçirdiklərini qeyd edən şəhid ailələri və qazilər dövlət tərəfindən onlara göstərilən diqqət və qayğını hər zaman çox yüksək qiymətləndirərək Azərbaycan Respublikasının Prezidenti cənab İlham Əliyevə və Azərbaycan Respublikasının Birinci vitse-prezidenti Mehriban xanım Əliyevaya dərin minnətdarlıqlarını bildirmişlər.
Daha sonra parkda rəmzi olaraq 44 ədəd şam ağacı əkilmişdir.
Allah bütün şəhidlərimizə rəhmət eləsin!
