Adəm Məmmədov “Legatus Hüquq Mərkəzi”nin direktoru oldu

Tanınmış hüquqşünas Adəm Məmmədov yeni hüquq mərkəzi təsis edib.

Xebernur.com əldə etdiyi məlumata görə, o, bundan sonra fəaliyyətini “Legatus Hüquq Mərkəzi”nin direktoru olaraq davam etdirəcək.

Qeyd edək ki, Adəm Məmmədov Azərbaycan Respublikası Vəkillər Kollegiyasının üzvü olub, ədliyyə kapitanıdır. Tanınmış vəkil bakalavr dərəcəsi üzrə Bakı Dövlət Universitetinin Beynəlxalq hüquq fakültəsində, magistr dərəcəsi üzrə isə Rusiya Xalqlar Dostluğu Universitetində təhsil alıb.

Adəm Məmmədov, həmçinin telejurnalist kimi də tanınır. Uzun illər “Lider” televiziyasında “Hüquq və ədalət”, “İnsan və qanun” verilişlərinin aparıcısı olub. O, oxucular tərəfindən böyük maraqla qarşılanan “Qətlin sonu” detektiv-triller və “Oğurlanmış adam” romanlarının müəllifidir. Azərbaycan Yazıçılar Birliyinin üzvüdür.

Vəkillik fəaliyyəti dövründə 40-dan artıq bəraət qərarına nail olduğu bildirilir. O, həmçinin Bakı Dövlət Universitetinin Hüquq fakültəsində Cinayət hüququ və kriminologiya kafedrasında müəllim kimi çalışıb.