Hövsanda futbol stadionu sökülür: sakinlər narahat, rəsmi izahlar ziddiyyətlidir

Son günlər sosial şəbəkələrdə Hövsan qəsəbəsində yerləşən futbol stadionunun sökülərək yerində bina tikilməsi ilə bağlı yayılan iddialar ictimai narazılıq doğurub.

Kanal 15 olaraq məsələni yerində araşdırmaq üçün əraziyə yollandıq. Stadionun girişində bizi nəzarətçi Namiq bəy qarşıladı. O, bildirdi ki, ərazidə “kompleks tikinti işləri aparılır” və “stadionun bərpası da layihəyə daxildir”. Onun sözlərinə görə, “gecə saatlarında heç bir iş görülmür və proses tam qanunidir”.

Lakin sakinlər fərqli fikirdədirlər. Onların sözlərinə görə, illərdir gənclərin idman etdiyi stadionun sökülməsi Hövsanda yeganə açıq idman məkanının itirilməsi deməkdir. Sakinlər hesab edirlər ki, “bərpa” adı altında stadionun yerində çoxmərtəbəli binaların inşasına start verilib.

Məsələ ilə bağlı aidiyyəti qurumların rəsmi mövqeyi hələlik ictimaiyyətə açıqlanmayıb.

Kanal 15 olaraq bu məsələnin izləyicisi olacağıq və Hövsan sakinlərinin səsi kimi onların narahatlığını işıqlandırmağa davam edəcəyik.