İctimaiyyətlə əlaqələr şöbəsinin müdiri Afət Telmanqızından Xatirə İslama sərt irad: “Heç olmasa Xankəndinin adını yalanlarla çirkləndirməyin”

İctimaiyyətlə əlaqələr şöbəsinin müdiri Afət Telmanqızı müğənni Xatirə İslamın son açıqlamalarına münasibət bildirib. Sənətçi mediaya verdiyi müsahibədə “Xankəndidə doğulan yeganə ifaçıyam, sənətim göz qabağındadır. Bəs niyə Xankəndidə və Şuşada keçirilən tədbirlərdə mən yoxam?” deyə sual etmişdi.

Afət Telmanqızı isə məsələ ilə bağlı açıqlamasında bildirib ki, Xatirə İslamın bəzi iddiaları həqiqəti əks etdirmir:

“Onun Xankəndidə doğulması real faktdır. Amma ‘məni dəvət etmirlər’ deməsi doğru deyil. Xankəndidə işlədiyim bir il ərzində keçirilən bütün bayram tədbirlərinə Xatirə İslam dəvət olunub. Lakin sənətçi hər dəfə müxtəlif səbəblər göstərərək iştirakdan imtina edib. Buna şəxsən şahidəm.”

Afət Telmanqızı vurğulayıb ki, hansı tədbirdə iştirak etməyin hər bir ifaçının şəxsi qərarıdır, lakin sonradan bunun əksini iddia etmək doğru deyil:

“İnanın ki, heç kimdən xüsusi gözlənti yoxdur. Amma insan doğulduğu yeri sevirsə, o torpağın mədəniyyətinə dəstək olmağa çalışar. Xankəndi onun doğulduğu şəhərdir, amma o buraya gəlməyi özünə çox görüb.”
O, açıqlamasını belə yekunlaşdırıb:
“Heç olmasa Xankəndinin adını yalan bəyanatlarla çirkləndirməyin.”

Qeyd edək ki, müğənni hazırda məsələ ilə bağlı yeni açıqlama verməyib.