Qazilərdən Baş Prokurorluğa müraciət: “Bizimləsən” verilişində təqdim edilən şəxs qazi deyil dələduzluq şübhəsi var.

Son zamanlar ATV Xəbər Az kanalında yayımlanan “Bizimləsən” verilişində, aparıcı Zaur Baxşəliyevin iştirakı ilə təqdim olunan süjet biz həqiqi qaziləri ciddi şəkildə narahat etmişdir.
Verilişdə guya “qazi” kimi təqdim edilən Əkbər adlı şəxsin, ictimaiyyətdə Şərurlu İsfəndiyar kimi tanınan iş adamı tərəfindən ona təxminən 120 min manat dəyərində ev verildiyi iddia olunmuşdur. Bu təqdimat cəmiyyətdə yanlış rəy formalaşdırmışdır.
Araşdırmalar nəticəsində məlum olmuşdur ki, Əkbər adlı şəxs nə qazi, nə də hərbi veteran statusuna malikdir.
Daha da narahatedici məqam isə ondan ibarətdir ki, sözügedən evin sonradan real bazar dəyərindən xeyli aşağı guya 33 min manata “satılması” faktı ictimaiyyətə məlum olmuşdur. Bu hal açıq şəkildə dələduzluq və etibardan sui-istifadə ehtimallarını gündəmə gətirir.
Bu cür hallar:
Həqiqi qazilərin adından sui-istifadəyə,
Cəmiyyətin duyğularının manipulyasiya edilməsinə,
Sosial ədalət prinsipinin pozulmasına səbəb olur.
Bu səbəbdən Azərbaycan Respublikasının Baş Prokurorluğuna müraciət edərək aşağıdakı məsələlərin araşdırılmasını xahiş edirik:
Sözügedən şəxsə “qazi” adı verilməsinin hüquqi əsasları araşdırılsın;
120 min manatlıq əmlakın verilməsi və sonradan 33 min manata “satılması” faktı üzrə dələduzluq əlamətləri hüquqi qiymətləndirilsin;
Bu prosesdə iştirak edən bütün şəxslərin məsuliyyəti qanun çərçivəsində müəyyən edilsin.
Biz qazilər adımızdan sui-istifadəyə qəti şəkildə qarşıyıq və bu məsələnin obyektiv, şəffaf və ədalətli şəkildə araşdırılmasını tələb edirik.