Sahil İmanov: “Azərbaycanda işsizlik yox, işləmək problemi var”

Tanınmış iş adamı Sahil İmanov Azərbaycanda əmək bazarındakı real vəziyyətlə bağlı sərt və diqqətçəkən açıqlama verib.
O, şəxsi sosial media hesabında paylaşım edərək bildirib ki, ölkədə işsizlikdən tez-tez danışılmasına baxmayaraq, real sektorda vəziyyət tam fərqlidir. Sahil İmanovun sözlərinə görə, rəhbərlik etdiyi şirkətlərdə aylardır açıq vakansiyalar mövcuddur, lakin işçi tapmaq ciddi problemə çevrilib.
“Uzun müddət mən də elə bilirdim ki, Azərbaycanda əsas problem işsizlikdir. Amma işin içində olanda gördüm ki, vəziyyət tamam başqadır. Şirkətlərimizdə aylardır vakansiyalar açıqdır, elanlar veririk, amma müraciət edənlərin sayı çox azdır. Müraciət edənlərin böyük hissəsi isə real iş şərtlərinə uyğun gəlmir. Açıq deyim: biz işçi tapa bilmirik”, – deyə iş adamı bildirib.
Sahil İmanov vurğulayıb ki, problem yalnız ixtisaslı kadr çatışmazlığı ilə məhdudlaşmır:
“Söhbət təkcə peşəkar mütəxəssislərdən getmir. Biz adi təmizlikçi belə tapa bilmirik”.
Onun fikrincə, cəmiyyətdə “Azərbaycanda iş yoxdur” kimi yanlış təsəvvür formalaşıb, lakin reallıq bunu təsdiqləmir:
“İş yerləri var. Hətta çoxlu iş yerləri var. Sadəcə işləmək istəyənlərin sayı azalıb. Hamı rahat ofis işi axtarır. Sahə işi, fiziki əmək və real məsuliyyət tələb edən sahələrə maraq demək olar ki, yoxdur”.
İş adamı bu tendensiyanın davam etməsinin ciddi fəsadlara yol aça biləcəyini də qeyd edib:
“Əgər bu yanaşma dəyişməsə, bir neçə ildən sonra ölkədə əsas problem işsizlik yox, peşəkar və işləmək istəyən işçi çatışmazlığı olacaq. Bu isə birbaşa iqtisadiyyata ciddi zərbə vuracaq”.