Qaradağ rayonunun Səngəçal qəsəbəsində yerləşən şəhid Fəzail Qədimov adına 222 saylı tam orta məktəbdə təhsilalanların sağlam, yaradıcı və təhlükəsiz mühitdə təhsil almasını təmin etmək məqsədilə növbəti maarifləndirici tədbir keçirilib. Tədbir məktəbin direktoru Aynurə Abdullayevanın təşəbbüsü və Daxili İşlər Nazirliyi ilə birgə əməkdaşlıq çərçivəsində təşkil olunub.

Tədbir çərçivəsində hüquq-mühafizə orqanlarının nümayəndələri ilə müəllim heyəti arasında diskussiya xarakterli görüş baş tutub. Görüşdə Qaradağ Rayon Polis İdarəsi rəisinin şəxsi heyətlə iş üzrə köməkçisi, polis kapitanı Seymur Xəlilzadə, eləcə də İctimai Təhlükəsizlik Şöbəsinin rəisi, polis polkovnik-leytenantı Ağaşirin Nəsibbəyli iştirak ediblər.
Müzakirələr zamanı məktəb mühitində təhlükəsizliyin gücləndirilməsi, şagirdlərin hüquqlarının qorunması, mümkün risklərin vaxtında qarşısının alınması və valideyn–məktəb–polis əməkdaşlığının əhəmiyyəti xüsusi vurğulanıb. Müəllim heyətinin səsləndirdiyi təklif və rəylər diqqətlə dinlənilib, qaldırılan məsələlərlə bağlı müvafiq tövsiyələr verilib.
Qeyd olunub ki, bu cür görüşlər məktəblərdə təhlükəsiz və sağlam təhsil mühitinin formalaşdırılmasına, eyni zamanda maarifləndirmənin gücləndirilməsinə mühüm töhfə verir. Tədbirin sonunda tərəflər əməkdaşlığın davamlı olmasının vacibliyini vurğulayıblar.