“Azərbaycan” Nəşriyyatında fəaliyyət göstərən jurnalistlər Prezidentə müraciət etdilər
“Azərbaycan” Nəşriyyatında fəaliyyət göstərən jurnalistlər Prezidentə müraciət etdilər.
“Azərbaycan” Nəşriyyatında uzun illərdir fəaliyyət göstərən media redaksiyalarının baş redaktorları Azərbaycan Respublikasının Prezidenti İlham Əliyev cənablarına kollektiv müraciət ünvanlayıblar.
Müraciətdə bildirilir ki, redaksiyalar uzun müddətdir “Azərbaycan” Nəşriyyatında icarəçi kimi fəaliyyət göstərsələr də, binanın əsaslı təmirinə ən çox ehtiyac duyan tərəf məhz media qurumları olub. Qeyd olunur ki, Prezidentin verdiyi göstərişlər əsasında nəşriyyat binasının əsaslı təmirə hazırlanması mətbuat nümayəndələri tərəfindən müsbət qarşılanır və bu diqqətə görə dövlət başçısına təşəkkür edilir.
Lakin müraciətdə ciddi narahatlıq doğuran məqamlar da yer alır. Belə ki, “Azərbaycan” Nəşriyyatının əsaslı təmirə bağlanması ilə əlaqədar redaksiyalarla bağlanmış icarə müqavilələri 1 fevral 2026-cı il tarixindən ləğv edilib və media qurumlarına qısa müddətdə binanı tərk etmələri bildirilib. Alternativ iş yerlərinin ayrılmaması isə onilliklərdir burada fəaliyyət göstərən redaksiyaları çıxılmaz vəziyyətə salıb.
Jurnalistlər bildiriblər ki, mövcud problemlə bağlı 02 fevral 2026-cı il tarixində “Azərbaycan” Nəşriyyatının qarşısında media nümayəndələrinin iştirakı ilə aksiya keçirilib. Aksiya zamanı aidiyyəti qurumlara və ölkə rəhbərliyinə çağırış edilib. Məsələ daha sonra Azərbaycan Mətbuat Şurasında müzakirə olunub. Şuranın sədri Rəşad Məcidlə keçirilən görüşdə üç əsas təklif irəli sürülüb.
Müraciətdə qeyd edilir ki, Prezident Administrasiyasının idarəçiliyində olan “Azərbaycan” Nəşriyyatının əsaslı təmirə bağlanması dəstəklənsə də, burada fəaliyyət göstərən redaksiyaların taleyinin diqqətdən kənarda qalması yolverilməzdir. Jurnalistlər müvəqqəti alternativ iş yerlərinin ayrılmasını, təmir başa çatdıqdan sonra redaksiyaların yenidən nəşriyyata qaytarılmasına rəsmi zəmanət verilməsini və gələcəkdə icarə haqlarının mətbuatın iqtisadi imkanlarına uyğunlaşdırılmasını vacib hesab edirlər.
Qeyd olunur ki, təmirə bağlanan binaya bitişik korpusda mövcud olan boş otaqların mətbuatla əlaqəsi olmayan qurumlara verilməsi də ciddi suallar doğurur.
Müraciətin sonunda jurnalistlər Prezidentə göstərdiyi diqqətə görə təşəkkür edir və problemin dövlət başçısının müdaxiləsi ilə ədalətli şəkildə həll olunacağına ümidlərini ifadə edirlər.
Müraciəti 20-dən çox media qurumunun baş redaktoru imzalayıb.
