“Su pulu” adı ilə yığılan vəsait – Füzulidə baş verən iddialar narahatlıq doğurur

Füzuli şəhər sakini Mirabbas Məmmədzadə iddia edir ki, məhz şəhər ərazisində özünü su təsərrüfatı işçisi kimi təqdim edən bir şəxs vətəndaşlardan qanunsuz şəkildə pul toplayır.

Onun sözlərinə görə, həmin şəxs rəsmi olaraq çilingər vəzifəsində çalışsa da, qapı-qapı gəzərək sakinlərdən “ödəniş vaxtı çatıb” bəhanəsi ilə pul tələb edir. Bəzi hallarda isə ödəniş etməyən vətəndaşlar suyun kəsiləcəyi ilə hədələnir.

İddialara əsasən, toplanan vəsaitlər şəxsin öz adına olan Kapital Bank kart hesabı vasitəsilə Azərsu ASC-nin rəsmi hesablarına köçürülür. Bu isə prosesin nə dərəcədə qanuni və şəffaf aparıldığı ilə bağlı ciddi suallar yaradır.

Baş verənlər vətəndaşların aldadılması və ya vəzifə səlahiyyətlərindən sui-istifadə ehtimalını gündəmə gətirir. Xüsusilə, rəsmi ödənişlərin niyə qeyri-rəsmi yollarla toplandığı sual doğurur.

Məsələ ilə bağlı Azərsu ASC tərəfindən araşdırma aparılması və ictimaiyyətə aydınlıq gətirilməsi gözlənilir.