Ramanı qəsəbəsində yaranmış vəziyyət artıq fövqəladə hal həddinə çatıb. Güclü su basqınları nəticəsində onlarla ev su altında qalıb, sakinlər isə ev-eşiksiz küçələrdə qalmağa məcbur olub.

İnsanlar günlərdir çarəsiz vəziyyətdədir.
Hadisənin ən narahatedici tərəfi isə məsul qurumların bu vəziyyətə laqeyd yanaşmasıdır. Azərsu tərəfindən heç bir operativ tədbirin görülməməsi, problemin aradan qaldırılması istiqamətində real addımların atılmaması sakinlərin haqlı narazılığına səbəb olur. Eyni zamanda yerli İcra Hakimiyyəti də sanki baş verənlərə göz yumur.

Bütün bu biganəliyin fonunda yalnız Fövqəladə Hallar Nazirliyi hadisə yerində aktiv fəaliyyət göstərir. Nazirliyin əməkdaşları günlərdir ərazidə fasiləsiz xidmət edir, suyun çəkilməsi və vətəndaşların təhlükəsizliyinin təmin olunması üçün çalışırlar.
Sual olunur: niyə digər məsul qurumlar susur? Niyə insanlar bu vəziyyətdə tək buraxılır? Dövlət qurumları yalnız böhran dərinləşəndəmi hərəkətə keçməlidir?
Bu hadisə bir daha göstərir ki, operativlik və məsuliyyət hər qurum üçün eyni səviyyədə deyil. İnsanların taleyi biganə yanaşmanın qurbanına çevrilməməlidir. Aidiyyəti qurumlar dərhal hərəkətə keçməli və yaranmış vəziyyətin aradan qaldırılması üçün konkret addımlar atmalıdır.