Moskvanın Xoroşevski Rayon Məhkəməsi “Rosaviasiya”nın keçmiş rəhbəri Aleksandr Neradko barəsində dələduzluq işi üzrə həbs qətimkan tədbiri seçib.

Xəbər verilir ki, bu barədə "Kommersant" qəzeti yazıb.

“Məhkəmə Rusiya Cinayət Məcəlləsinin 159-cu maddəsinin 4-cü hissəsi (xüsusilə külli miqdarda dələduzluq) ilə ittiham olunan Neradkonun barəsində istintaqın həbs qətimkan tədbiri seçilməsi barədə vəsatətini təmin edib”.

Məlumata görə, cinayət işi Moskvanın Domodedovo Hava Limanında yeni uçuş-enmə zolağının tikintisi zamanı 800 milyon rublun mənimsənilməsi ilə bağlıdır.

Xoroşevski Rayon Məhkəməsi “Rosaviasiya” rəhbərinin keçmiş müavini Konstantin Maxov barəsində 1 ay 7 gün müddətinə həbs qətimkan tədbiri seçib.

Konstantin Maxov xüsusilə külli miqdarda dələduzluqda ittiham olunur.

İstintaqın irəli sürdüyü ittihama əsasən, hər iki şəxs Rusiya Cinayət Məcəlləsinin 159-cu maddəsinin 4-cü hissəsi (xüsusilə külli miqdarda dələduzluq) ilə təqsirləndirilir.

Həmin maddə üzrə Aleksandr Neradko və Konstantin Maxov 10 ilədək azadlıqdan məhrumetmə cəzası ilə üzləşə bilərlər.