Yaponiyanın Kyuşu adasındakı Kumamoto prefekturasında baş verən silsilə zəlzələlər nəticəsində azı 13 nəfər həyatını itirib.

Xəbər verilir ki, bu barədə Yaponiyanın Baş naziri Sanae Takaiçi bildirib. Onun sözlərinə görə, təbii fəlakət nəticəsində binalar dağılıb, yanğınlar baş verib, yollar zədələnib və bölgəyə ciddi maddi ziyan dəyib.

Bununla yanaşı, NHK telekanalı Kumamoto prefekturasının rəsmilərinə istinadən bildirib ki, çərşənbə günü saat 09:30-a olan məlumata əsasən, 3 nəfərin ölümü təsdiqlənib, 5 nəfərdə ürək fəaliyyətinin dayanması qeydə alınıb, 31 nəfər isə müxtəlif dərəcəli xəsarətlər alıb.

Zəlzələ zamanı Kaqoşima prefekturasının Kaşima yaşayış məntəqəsində yerləşən ticarət mərkəzində partlayış baş verib. Kyodo agentliyinin mənbəsinin bildirdiyinə görə, hadisəyə qaz partlayışı səbəb olub.

Rəsmilər ticarət mərkəzinin ikinci mərtəbəsinin çökdüyünü açıqlayıblar. Axtarış-xilasetmə əməliyyatları gecə boyu davam edib. Sonradan dağıntılar altında qalan təxminən 20 yaşlarında iki qadının öldüyü təsdiqlənib. Daha bir nəfərdə ürək fəaliyyətinin dayanması qeydə alınıb. Xilas edilən digər şəxslərin isə həyati təhlükəsi olmayan xəsarətlər aldığı bildirilib.

İkinci mərtəbə çökməzdən əvvəl ticarət mərkəzindən təxminən 200 nəfər təxliyə olunub.

Bundan başqa, Kumamoto prefekturasının Yatsuşiro şəhərində yerləşən Nippon Paper Industries zavodunda da iki nəfər ürək fəaliyyətinin dayanmış vəziyyətdə aşkarlanıb. Zəlzələ nəticəsində müəssisənin ərazisində yerləşən tüstü borusu da aşıb.

Kumamoto rəsmiləri daha 9 nəfərin itkin düşdüyünü açıqlayıblar.

Zəlzələdən sonra sürətli Şinkansen qatarlarının hərəkəti hələ də bərpa edilməyib.

Həmçinin Japan Airlines 11, All Nippon Airways isə 2 reysi ləğv edib.

Kumamoto prefekturasında təxminən 37 min ev təsərrüfatı hələ də elektrik enerjisiz qalıb.

Xatırladaq ki, çərşənbə axşamı Kumamoto prefekturasında 7,1 bal gücündə zəlzələ qeydə alınmış, ən güclü yeraltı təkanlar Uki və Kikava şəhərlərində hiss edilmişdi.