Kanal 15 TV-yə daxil olan məlumata əsasən, Qarabağ qazisi, Naftalan şəhər sakini Bəhruz Məmmədovla bağlı ciddi iddialar səsləndirilib.

Qazilər tərəfindən verilən məlumata görə, Bəhruz Məmmədov Maştağadakı 9-cu şöbədə olarkən ona qarşı düzgün olmayan münasibət göstərildiyi və ağır təsirli iynə-dərmanların vurulduğu iddia olunur.

Qazilərin bildirdiyinə görə, Bəhruz Məmmədovu ziyarət etmək istəyən bəzi şəxslərə maneələr yaradılıb və onlara qarşı hədə xarakterli ifadələr işlədilib. İddialara görə, sanitar ziyarətçilərə “bütün şöbələrə əlimiz çatır” ifadəsini səsləndirib.

Qazilər bildirirlər ki, Vətən uğrunda döyüşmüş şəxslərə qarşı belə münasibət yolverilməzdir və bu kimi iddialar ciddi şəkildə araşdırılmalıdır.
Bəhruz Məmmədovun ailəsi baş verənlərlə bağlı aidiyyəti qurumlardan araşdırma aparılmasını və məsələyə hüquqi qiymət verilməsini tələb edir.

Qeyd edək ki, xəbərdə yer alan məlumatlar daxil olan müraciət və iddialar əsasında hazırlanıb. Qarşı tərəfin mövqeyi təqdim olunacağı təqdirdə materiala əlavə ediləcək.