Dövlət qurumlarının bank əməliyyatlarına nəzarət gücləndirilir
Xəbər verilir ki, dəyişikliklər dövlət maliyyə nəzarətinin artırılmasına və dövlət sektorunda bank əməliyyatları üzrə müşahidə mexanizmlərinin mərkəzləşdirilməsinə yönəlib.
Qanuna əsasən, dövlət orqanlarının, dövlət mülkiyyətində olan və paylarının nəzarət zərfi dövlətə məxsus hüquqi şəxslərin (maliyyə bazarlarını tənzimləyən qanunlarla Azərbaycan Respublikasının Mərkəzi Bankı-nın nəzarət etdiyi subyektlər istisna olmaqla), dövlət adından yaradılan publik hüquqi şəxslərin, eləcə də dövlət büdcəsindən maliyyə alan digər təşkilatların bank hesabları üzrə müşahidə funksiyalarının həyata keçirilməsi məqsədilə bank sirri təşkil edən məlumatlar banklar tərəfindən Azərbaycan Respublikasının Maliyyə Nazirliyinə təqdim olunacaq.
Bununla Maliyyə Nazirliyi dövlət sektoruna aid bank hesabları üzrə vəsait hərəkətləri barədə məlumatları birbaşa əldə etmək imkanı qazanır.
Eyni zamanda, dövlət orqanları və dövlətə məxsus hüquqi şəxslər vergi orqanında uçota alındıqda, yenidən təşkil edildikdə və ya uçotdan çıxarıldıqda onların adı, VÖEN-i və bank hesabları barədə məlumatlar növbəti ayın 15-dək elektron qaydada Maliyyə Nazirliyinə təqdim ediləcək.
Habelə, həmin qurumlara məxsus bank hesabları barədə məlumat vergi orqanına daxil olduqdan sonra bu məlumat 1 iş günü müddətində elektron formada Maliyyə Nazirliyinə ötürüləcək.
