Qarabağ qazisi Bəxtiyar Məmmədli reabilitasiya gecikmələrinə etiraz etdi: “Bu, açıq özbaşınalıqdır”

Səhiyyə Nazirliyinin tabeliyində olan reabilitasiya mərkəzlərinə göndərişlərin aylarla gecikdirilməsi Qarabağ qazilərinin haqlı narazılığına səbəb olub. Qarabağ qazisi Bəxtiyar Məmmədli məsələ ilə bağlı kəskin etiraz edərək bildirib ki, Vətən müharibəsində sağlamlığını itirmiş döyüşçülərin 6–7 ay növbədə saxlanılması nə qanuna, nə vicdana, nə də dövlət yanaşmasına sığır.
Qazi vurğulayıb ki, reabilitasiya tibbi baxımdan təxirəsalınmaz prosesdir və vaxtında göstərilməyən yardım yaralıların sağlamlığının daha da ağırlaşmasına gətirib çıxarır. Onun sözlərinə görə, süni növbələr və əsassız gecikmələr sistemli biganəliyin göstəricisidir.
“Biz bu dövlət uğrunda canımızı, sağlamlığımızı vermişik. Bu gün isə aylarla gözləməyə məcbur edilirik. Biz dilənmirik haqqımızı tələb edirik,” – deyə Bəxtiyar Məmmədli qeyd edib.
Qazi həmçinin sual edib: niyə Vətən müharibəsi iştirakçılarına və müharibə əlillərinə vaxtında göndəriş verilmir, bu gecikmələrin məsuliyyətini kim daşıyır və Səhiyyə Nazirliyi bu vəziyyətə niyə göz yumur?
İctimaiyyət tərəfindən də dəstəklənən bu etiraz bir daha göstərir ki, Qarabağ qazilərinin reabilitasiya və tibbi təminat məsələsi təcili və sistemli şəkildə həllini tapmalıdır. Əks halda, bu cür süründürməçilik dövlətin sosial ədalət prinsipinə ciddi xələl gətirir.