Son vaxtlafr aparılan kadr dəyişikliklərinə nəzər yetirdikdə bir nüans diqqət çəkir: yaşı 70 və daha çox olan məmurlar vəzifədən kazad edilir. Sonuncu dəfə hərbi prokuror Xanlar Vəliyev vəzifəsindən çıxarıldı və Konstitusiya məhkəməsinə hakim təyin edildi.

Açıqlamasında Milli Məclisin deputatı Razi Nurullayev bildirib ki, kadr islahatlarında gəncləşmə hər zaman olur və bu, vacibdir:

"Lakin yaşlı insanların da təcrübəsinə daim ehtiyac var. Onların təcrübəsindən istifadə etməmək yanlış olardı. Mənə elə gəlir ki, bizim dövlətimizdə bu məsələlər düzgün koordinasiya olunur. Çünki yaşlı insanların silinməsi prosesi getmir. Onlar müəyyən zaman ərzində işləyiblər, sonra da başqa kadrlarla əvəzlənirlər. Öz təcrübələrini başqa sahədə də davam etdirə bilirlər. Xüsusi dövlət təcrübəsi, hüquqi bilikləri olan insanların da Konstitusiya Məhkəməsində hakim işləməsi başadüşüləndir. Konstitusiya Məhkəməsində çox təcrübəli kadrlara ehtiyac var. Bu baxımdan mən deyərdim ki, ölkəmizdə gəncləşmə siyasəti aparılır. Amma eyni zamanda yaşlı nəslin təcrübəsindən də normal istifadə olunub və istifadə olunmalıdır".



R.Nurullayev vurğulayıb ki, hər bir sahədə təcrübə daha önəmlidir:

"Təcrübəsiz nələrisə etmək hər zaman yanlışlıqlara yol açıb. Müəyyən müddət vəzifədə olan insanların təcrübəsindən daha intensiv istifadə olunmalıdır. Bunu bəzən unuduruq. Vəzifədə xeyli zaman keçirən, təcrübəsi olan insanların işləməsinin, onların təcrübəsindən dövlətimizin yararlanmasının tərəfdarıyam. Öz işlərimdə, deputatlıq fəaliyyətimdə görürəm ki, təcrübəli insanlarla məsələləri həll etmək daha asan başa gəlir. Çünki onlar təcrübə qazanıblar, müəyyən yolları, mexanizmləri daha yaxşı bilirlər. Onlar daha da özlərinə inamlı olurlar. Təbii ki, gənc nəsil də öyrənməlidir. İmkan yaradılmalıdır ki, onlar da öyrənib müəyyən təcrübələrə malik olsunlar".