İyunun 11-də “Gənclər Paytaxtı” Sumqayıt şəhərində Vətən müharibəsində əldə edilən Zəfərin 5 illiyinə həsr olunmuş XXVIII “Şahin” hərbi-idman oyununun final mərhələsi keçirilib.

Tədbirdə hərbi orkestrin müşayiəti ilə Dövlət Himni səsləndirilib. Ardınca isə Ümummilli Lider Heydər Əliyevin və Azərbaycanın ərazi bütövlüyü və torpaqlarımızın azadlığı uğrunda canından keçən şəhidlərin əziz xatirəsinin bir dəqiqəlik sükutla yad edilib.

Gənclər və İdman Nazirliyinin təşkilatçılığı, Müdafiə Nazirliyi, Fövqəladə Hallar Nazirliyi, Elm və Təhsil Nazirliyi, Səfərbərlik və Hərbi Xidmətə Çağırış üzrə Dövlət Xidmətinin tərəfdaşlığı ilə keçirilən “Şahin” hərbi-idman oyununun finalında 14 komanda sıra hazırlığı, darağa patronların doldurulması və boşaldılması, avtomatın sökülməsi və yığılması, fiziki hazırlıq, maneələrin dəf olunması, tüfəngdən hədəfə atəş açılması, mülki müdafiə hazırlığı, çadırın qurulması və intellektual müsabiqə mərhələlərində güclərini sınayıblar.

Sumqayıt şəhər komandası birinci, Sabunçu rayon komandası ikinci, Xaçmaz rayon komandası isə üçüncü yerə layiq görülüblər.

Bağlanış mərasimində gənclər və idman naziri Fərid Qayıbov, Sumqayıt Şəhər İcra Hakimiyyətinin başçısı Zakir Fərəcov və Vətən müharibəsi qəhrəmanı Anar Mirzəyev çıxış ediblər. Müdafiə Nazirliyinin Xüsusi Təyinatlı Dəstəsinin nümunəvi çıxışı təqdim edilib.

Qeyd edək ki, bu il “Şahin” hərbi-idman oyunu ümumilikdə 22 min məktəblini əhatə edib.