İyunun 13- də Kəlbəcər rayon Ağsaqqallar şurasının və Kəlbəcər rayon Mərkəzi Xəstəxanasının təşəbbüsü ilə 15 İyun Milli Qurtuluş Günü ilə əlaqədar tədbir keçirilib.

Tədbirdə Kəlbəcər rayon Ağsaqqallar şurasının sədri Aqil Məmmədov, Kəlbəcər rayon İcra Hakimiyəti İctimai-siyasi və humanitar məsələlər şöbəsinin müdir müavini Heydər Bəylərov, Təqaüddə olan Kəlbəcər rayon Mərkəzi Xəstəxanasının keçmiş Həkim-kardioloqu Adil Nəcəfov, Kəlbəcər rayon Polis şöbəsinin sabiq rəisi Elçin Abdullayev, Kəlbəcər rayon Mərkəzi Xəstəxanasının direktor müavini Fariz Camallı və Kəlbəcər rayon Mərkəzi Xəstəxanasının kollektivi iştirak ediblər.

İlk öncə Azərbaycan xalqının Ümummilli Lideri Heydər Əliyevin və şəhidlərimizin əziz xatirəsi bir dəqiqəlik sükutla yad edilib.

Tədbirdə çıxış edən Kəlbəcər rayon Ağsaqqallar şurasının sədri Aqil Məmmədov bildirib ki, Azərbaycan xalqının taleyində böyük əhəmiyyət daşıyan elə günlər var ki, həmin günlərdə onun gələcək həyatını müəyyən edən mühüm başlanğıcların əsası qoyulub. Belə günlərdən ən önəmlisi tariximizə qızıl hərflərlə yazılmış 15 İyun – Milli Qurtuluş Günüdür. Bu gün Azərbaycan xalqı üçün sadəcə təqvim bayramı deyil, böyük ictimai, siyasi və tarixi əhəmiyyətə malik bir gündür. Bu tarixi yaradan isə Azərbaycanın müstəqilliyinin qorunub saxlanmasında, möhkəmlənməsində, inkişafında müstəsna rol oynayan, daim xalqına arxalanan Heydər Əliyevdir. Aqil Məmmədov qeyd edib ki, Heydər Əliyev Azərbaycan dövlətini xaos və anarxiyadan eləcə də dövlətçiliyin itirilməsi təhlükəsindən xilas edib. Dinamik islahatlar yoluna çıxardığı Azərbaycan hazırda onun layiqli davamçısı Prezidenti İlham Əliyevin rəhbərliyi ilə dünyanın ən sürətlə inkişaf edən, yeniləşən, müasirləşən, demokratikləşən qalib və müzəffər bir dövlətə çevrilib.
Çıxış edən digər natiqlər bildirilib ki, Ümummilli lider Heydər Əliyev bütün həyatı və fəaliyyəti boyunca daima vətənini, onun suverenliyini, dövlətimizin güclənməsini düşünüb. Azərbaycanın ən çətin məqamlarında, üzləşdiyi faciələrdən, çətinliklərdən, bir dövlət kimi məhv olmaq təhlükələrindən xilas etmək üçün misilsiz xidmətlər göstərib. Natiqlər qeyd ediblər ki, Ümummilli Lider Heydər Əliyevin müəyyənləşdirdiyi siyasi kursu uğurla davam etdirən Prerzident İlham Əliyev vətənimizin ərazi bütövlüyünü təmin edib, Müzəffər Ali Baş Komandanın “Dəmir yumruğ”u ətrafında birləşən ordumuz Vətən müharibəsində düşmən üzərində şanlı qələbə qazanıb və bununla da ata nəsihəti yerinə yetirib. Bu gün ölkəmizdə onun yarımçıq qalmış arzularını xalqımız Azərbaycan Respublikasının Prezidenti İlham Əliyevin başçılığı altında reallaşdırır. İndi Azərbaycanın haqq səsi dünyanın ən yüksək tribunalarından eşidilməkdədir.
Hər birimiz bu gün ulu öndərimizi xatırlayır, iftixarla deyirik ki, bəli, Azərbaycanın ümummilli lideri, Azərbaycan dövlətinin xilaskarı, yeni Azərbaycanın memarı Heydər Əliyev bizim qəlbimizdə daim yaşayır və yaşayacaq, gələcək nəsillər onun həyat yolunu araşdıracaq və öyrənəcəklər. Memarı və qurucusu ümummilli liderimiz olan müstəqil dövlətimiz qarşısında hər bir vətəndaşın borcu Heydər Əliyevin şah əsəri olan Azərbaycanı qoruyub yaşatmaqdır.