Bir neçə gün öncə Nərimanov rayonu Baksol yolu adlanan ərazidə yolun çökməsi nəticəsində 1997-ci il təvəllüdlü Cümşüd Cümşüdlü kanalizasiya sularının axdığı kanala düşüb. 28 yaşlı gəncin meyiti iki gün sonra Hövsan ərazisində tapılıb.

Məlum olub ki, həmin ərazi Dövlət Su Ehtiyatları Agentliyinə aiddir. Adı çəkilən qurumun açıqlamasında hadisənin baş verməsinə sahibkarların səbəb olduğu bildirilib. Qeyd edilib ki, qəza baş verən ərazidə xəbərdaredici nişanların, həmçinin dəmir məhəccərlərin quraşdırılmasına baxmayaraq, əraziyə iritonnajlı yük maşınları daxil ola bilsin deyə, sahibkarlar xəbərdaredici və qadağanedici nişanları yığışdırıblar:

“Hadisə baş verdiyi ərazidə çökmüş kollektorun üzərinin sahibkarlar tərəfindən taxta parçaları ilə örtülməsi həmin ərazinin qəzalı olduğunu görməyə əngəl yaradıb. Məhəccərlərin götürülməsi və çöküntü yerinin primitiv üsulla qapadılması vətəndaşa vəziyyətin qiymətləndirilməsinə imkan verməyib və o qəzalı əraziyə yaxınlaşıb. Nəticədə bədbəxt hadisə baş verib”.

Baş Prokurorluq hadisə ilə bağlı cinayət işinin başladıldığı haqqında məlumat yayıb.
Qurumun açıqlamasından məlum olur ki, gəncin ölümünə səbəb məsuliyyətsizlik olub. Sahibkarların özbaşınalığı
na aidiyyatı qurum da ciddi yanaşmayıb.

Bəs həmin gəncin ölümünə görə kim, hansı qurum kompensasiya ödəməlidir?

Məsələ barədə Bizim.Media-ya danışan deputat Razi Nurullayev deyib ki, cavabdeh qurumlar kompensasiya ödəməlidirlər:

“28 yaşlı gəncin kanalizasiya xəttinə düşərək ölməsi həqiqətən məsuliyyətsizlik səbəbindən baş verib. Hər halda yol çöküb və kanalizasiya xəttinin üstü açıq olub, yalandan ora bir taxta qoyulub. Kanalizasiya xəttinə də, yola da cavabdehlik daşıyan qurumun, hər ikisinin bu məsələdə çox ciddi məsuliyyətsizliyi var. Vətəndaş həyatını itirib. Çox zülmlə vəfat edib, kanalizasiya kanalına düşüb, çirkabın içərisində boğulub və o boyda yolla əzilə-əzilə gedib meyiti Hövsandan tapılıb. Yəni bu, insanın yaşaya biləcəyi ən dəhşətli ölümdür. Təbii ki, aidiyyəti qurum bununla bağlı kompensasiya ödəməlidir”.

Milli Məclisin üzvü bildirib ki, bütün ölkə boyu harda açıq “lük”lər, təzadlı, problemli, fəlakət törədə biləcək yerlər var araşdırılmalıdır:


“Söz vermişəm ki, onları gördükcə hamısını çəkib video şəklində paylaşacağam. Neçə yerdə görürəm ki, işıq dirəyi qıırlıb və ya reklam lövhəsi götürülüb, onun yerində uzun boltlar qalıb. Kimsə qaçanda yıxılsa, dörd bolt onun qarnından girib kürəyindən çıxacaq. Yəni bu cür məsuliyyətsizliyə necə göz yummaq olar? Bakıda, rayon və kəndlərimizin bir çox yerlərində də insanların həyatına 24 saat təhlükə yarada biləcək yerlər var. Niyə onlarla bağlı tədbir görülmür?

Amma bir vətəndaş daşı daş üstünə qoymaq istəyəndə gəlib ərəbzəngi kimi başının üstünü kəsdirib məhv etməyə çalışırlar. Qanunsuzdur, olmaz deyirlər. Öz qanuni vəzifələrini yerinə yetirib vətəndaşların həyatına təhlükə törədən problemləri həll etməlidirlər. İstəyirəm ki, bu hadisədə məsuliyyət məsələsi ciddi şəkildə qoyulsun, bununla bağlı görüləcək tədbirlər, cəzalar haqqında ictimaiyyətə məlumat verilsin”.

Günay Şahmar, Bizim.Media