Dövlət dili statusu
Bir millətin millət olaraq var olması üçün onun dilinin və əlifbasının olması əsas amillərdəndir. Dil milli varlığın əsas atributlarından biri olduğu kimi eyni zamanda da həmin millətin simasını əks etdirən və onu əbədi yaşadan əvəzolunmaz tarixi sərvətdir. Birmənalı olaraq deyə bilərik ki, millətin simasını əks etdirən dil həmin dövlətin tarixi sərvətidir. Bu baxımdan dilimizə sahiblənmək və onu qorumaq hər birimizin müqəddəs borcudur. Hər bir dilin ana dili kimi formalaşması və təsdiqini tapması üçün onun əlifbasının olması vacibdir. Bu gün hər birimiz Azərbaycan dilinin dövlət statuslu dillər arasında olmasına və bu dilin mənəvi dirilik atributuna çevrilməsi yolundakı xdmətlərinə görə ümummilli lider Heydər Əliyevə minnətdar olmalıyıq.
Ulu öndər Heydər Əliyev milli-mənəvi dəyərlərimizin ən qiymətlisi və milli varlığımızın rəmzi olan Azərbaycan dilinin saflaşdırılması və inkişafı istiqamətində çox mühüm addımlar atmışdır. Ölkəmizdə Azərbaycan dilinin hərtərəfli inkişaf etməsi, işlək dilə çevrilməsi, beynəlxalq münasibətlər sisteminə yol tapmasında ulu öndər Heydər Əliyevin xidmətləri əvəzolunmazdır.
Azərbaycan dilinin dövlət statuslu dillər arasında olmasında və bu dilin mənəvi dirilik atributuna çevrilməsində Azərbaycan ziyalılarının - şair, yazıçı, dramaturq və dilçilərinin də çox böyük xidmətləri olmuşdur.
1993-cü ildə Heydər Əliyevin Azərbaycanda ikinci dəfə hakimiyyətə qayıdışından sonra Azərbaycan dili öz inkişafında yeni mərhələyə qədəm qoydu. 12 noyabr 1995-ci ildə ümumxalq səsverməsi yolu ilə qəbul edilən müstəqil dövlətimizin ilk Konstitusiyası ilə dövlət dilinin adı bərpa edildi. Bu, ulu öndərin ana dilimizə dəyişməz mövqeyinin daha bir parlaq nümunəsi oldu. Ulu Öndərin bu sözləri yaddaşımıza həkk olub: "Ana dilimiz müstəqil Azərbaycanın, Azərbaycan xalqının ən böyük milli sərvətidir".
Bundan sonra hökumət səviyyəsində ana dilinin inkişafı və qorunması istiqamətində əhəmiyyətli sənədlər qəbul edildi. “Dövlət dili işinin təkmilləşdirilməsi haqqında” 18 iyun 2001-ci il tarixli fərman, yeni əlifbaya keçidin 2001-ci ilin avqustuna kimi ölkəmizdə bütünlüklə təmin edilməsi ulu öndərin öz doğma dilinə bağlılığını bir daha təsdiq etdi. Ümummilli liderin 9 avqust 2001-ci il tarixli fərmanı ilə avqustun 1-i ölkəmizdə “Azərbaycan dili və Azərbaycan Əlifbası Günü” kimi qeyd olunur. 2002-ci il 30 sentyabr tarixdə “Azərbaycan Respublikasında Dövlət dili haqqında” Azərbaycan Respublikasının Qanununun qəbul edilməsi Azərbaycan dilinin dövlət dili kimi işlədilməsi, onun tətbiqi, qorunması və inkişaf etdirilməsi istiqamətində daha bir addımdır. Bu sənəd ümummilli lider Heydər Əliyevin xalqımıza və onun dilinə tükənməz məhəbbətinin, qayğısının parlaq nümunələrindən biridir. Bu ənənələri ölkə Prezidenti İlham Əliyev uğurla davam etdirməkdədir. Dövlət başçısının müxtəlif vaxtlarda imzaladığı “Azərbaycan dilində latın qrafikası ilə kütləvi nəşrlərin həyata keçirilməsi haqqında” və “Azərbaycan Milli ensiklopediyasının hazırlanması haqqında” sərəncamları və bu istiqamətdə görülən işlər də dilimizin inkişafına böyük qayğının təzahürüdür. Milli-mənəvi dəyərlərin ən qiymətlisi və bir millət kimi milli varlığın rəmzi olan Azərbaycan dilinin saflaşdırılması və inkişafı istiqamətində bu günə qədər çox mühüm addımlar atıb. Ölkədə Azərbaycan dilinin hərtərəfli inkişafı, işlək dilə çevrilməsi, beynəlxalq münasibətlər sisteminə yol tapması dilin qorunmasına yönələn düşünülmüş siyasətinin nəticəsidir.
İlqar Şahverdiyev
YAP Laçın rayon təşkilatının 50 sayı ƏPT-nın fəalı
Bayram Məmmədov adına Minkənd kənd tam orta ümumtəhsil məktəbin direktoru
