Hacıqabulda şəhid ailələrinə diqqət və qayğı göstərildi

Hacıqabul Rayon İcra Hakimiyyətinin başçısı Sevindik Hətəmov və hüquq-mühafizə orqanlarının nümayəndələri Vətən müharibəsində qəhrəmancasına şəhidlik zirvəsinə ucalan igidlərimizin ailə üzvlərini ziyarət ediblər.

Ziyarət zamanı şəhidlərin xatirəsi ehtiramla yad olunub, ailələrinin qayğıları ilə maraqlanılıb, onların problemlərinin həlli istiqamətində müvafiq tapşırıqlar verilib. Bu təşəbbüs bir daha sübut edir ki, şəhid ailələrinə göstərilən diqqət və qayğı dövlət siyasətinin mühüm prioritetlərindən biridir.

Hacıqabul Rayon İcra Hakimiyyətinin başçısı Sevindik Hətəmov ziyarət zamanı qeyd edib ki, Vətən uğrunda canından keçən hər bir qəhrəman xalqımızın qürur mənbəyidir və onların ailələrinə xidmət etmək dövlətin vəzifəsi olmaqla yanaşı, həm də mənəvi borcdur.

Hüquq-mühafizə orqanlarının əməkdaşları da şəhid ailələrinin daim dövlətin diqqətində olacağını bildiriblər. Onların vurğuladığı kimi, Azərbaycan dövləti və xalqı heç vaxt şəhidlərinin qanını yerdə qoymayıb və qoymayacaq.

Ziyarətdə şəhid ailələri göstərilən bu qayğıya görə öz minnətdarlıqlarını ifadə ediblər.

“Sosial Dövlət Naminə” İctimai Birliyinin mətbuat xidmətinin rəhbəri, “Həkəri” qəzetinin xüsusi müxbiri Hamlet Abbasov da təşəbbüsə görə Rayon İcra Hakimiyyətinin başçısına və hüquq-mühafizə orqanlarının əməkdaşlarına təşəkkür edib:

“Allah bütün şəhidlərimizə rəhmət eləsin! Qəhrəman şəhidlərimizin müqəddəs ruhları qarşısında baş əyirik. Onların ailələrinə sahib çıxmaq, onların yanında olmaq həm dövlətimizin, həm də cəmiyyətin borcudur.”

Bu kimi addımlar, şəhid ailələrinin daim diqqət mərkəzində saxlanıldığını və onlara göstərilən qayğının dövlət siyasətinin ayrılmaz hissəsi olduğunu bir daha təsdiqləyir.

Hamlet Abbasov
"Sosial Dövlət Naminə" ictimai birliyinin mətbuat xidmətinin rəhbəri
"Həkəri" qəzetinin xüsusi müxbiri