Totanlı küçəsində şəhidlərə hörmətsizlik iddiası: “Bu münasibət qəbulolunmazdır”

Gəncə şəhərinin Totanlı küçəsi sakinləri ərazidə şəhidlərin xatirəsinə qarşı açıq-aşkar hörmətsizlik edildiyini bildirərək ciddi narazılıq ifadə ediblər. Sakinlərin sözlərinə görə, küçədə yığılan tullantılar, baxımsızlıq və nəzarətsizlik şəhid ailələrini və yerli əhalini dərindən sarsıdır.

Sakinlər iddia edirlər ki, məsul qurumlar dəfələrlə əraziyə gəlsə də, heç bir real tədbir görülmür. Nəticədə şəhərin müxtəlif yerlərindən gətirilən zibillər və tikinti qalıqları şəhidlərin adını daşıyan ərazilərin yaxınlığında toplanır. Bu isə insanların qəzəbinə səbəb olur.

Şikayətçilər vəziyyəti belə təsvir edirlər:

“Şəhidlərə hər yerdə hörmət göstərilir, amma burada tam əksinədir. Gəlirlər, baxıb gedirlər. Nə təmizlik var, nə qayğı. Şəhidin adına olan küçəni zibil yığnağına çevirmək hörmətsizlikdən başqa nədir?”

Sakinlərin sözlərinə görə, diqqətsizlik o həddə çatıb ki, körpünün altı və ətraf sahələr tullantılarla doludur, lakin məsul qurumlar buna heç bir reaksiya vermir.

“Bu, sadəcə idarəçilik problemi deyil, bu, şəhid ruhuna hörmətsizlikdir. Biz bunu qəbul edə bilmərik.” deyə sakinlər bildiriblər.

Totanlı küçəsi sakinləri aidiyyəti dövlət qurumlarını məsələyə dərhal müdaxilə etməyə, şəhidlərin adını daşıyan ərazilərin layiq olduğu şəkildə bərpa olunmasına çağırırlar.