Kanal 15 Tv.com saytının “Şəhiddən qalan son foto” rubrikası davam edir. Budəfəki təqdimatımız Aprel döyüşlərində şəhid olmuş, "Murov qartalı" kimi tanınan polkovnik-leytenant Raquf Orucovun əziz xatirəsinə həsr olunur.

Şəhidin həyat yoldaşı Sevinc Orucovanın sözlərinə görə, Raquf Orucovun ailəsi ilə son fotosu 2016-cı il martın 23-də - Novruz bayramından sonrakı gün çəkilib.

Həmin gün Raquf Orucov axşam saatlarında evə gəlib. Ailəsi ilə görüşdükdən sonra təcili işi olduğunu və yenidən geri qayıtmalı olduğunu deyib.

“Novruz bayramından sonrakı gün, martın 23-ü idi. Axşam gəldi və dedi ki, “Mən çıxacağam, təcili işim var, qayıtmalıyam. Görüşməyə gəlmişəm”. Mən də bütün qohum-əqrəbaya, qardaşlarına xəbər verdim ki, gəlin, Raquf gəlib. Elə bil insanın ürəyinə nəsə damır… Qardaşlarından birinin uşağı xəstə idi, dedi ki, görüşə gələ bilməyəcəklər. Mən isə dedim ki, heç kim Raqufdan önəmli deyil, gəlin, görüşün”.

Sevinc Orucova xatırlayır ki, həmin axşam ailə üzvlərinin hamısı bir yerə yığışıb. Raqufun evə gəlməsi ailə üçün həmişə xüsusi gün sayılıb.

“Raquf gələndə elə bil bizə bayram olurdu. Biz bayramı Raqufla qeyd edirdik. Hamımız yığışdıq, yeməyimizi yedik. Sonra dedi ki, “Yox, mən getməliyəm”. Hazırlaşdı, hərbi formasını geyindi”.

Son foto da məhz Raquf Orucov evdən çıxmağa hazırlaşarkən çəkilib. Sevinc xanım deyir ki, uşaqlar onun hərbi formasına xüsusi maraq göstərir, Raqufla fəxr edirdilər.

“Qaynım dedi ki, “Bir şəkil çəkdirək, qoy uşaqlarla sənin şəklini çəkim”. Şəkildəki üç uşaq qardaşlarının övladlarıdır, biri də bizim Nihatdır, eynəkli uşaq. Uşaqlar onunla fəxr edirdilər. Eynəklərini taxdılar, hamısı düzülüb yanında dayandılar”.

Foto çəkilən zaman Raquf Orucov artıq hərbi çəkmələrini də geyinmiş, evdən çıxmağa hazırlaşmışdı. Ailə üzvlərinin onunla son görüşü də elə həmin an olub.

“Ondan sonra Raqufu bir daha görmədik. Bizə qalan isə bu şəkil oldu. Yaxşı ki, qaynım onu çəkmişdi. Raquf artıq çəkmələrini də geyinmişdi, qapıdan çıxırdı. Son dəfə də elə onda gördük”.

Foto sonradan yayıldıqdan sonra şəkildəki dörd uşağın hamısının Raquf Orucovun övladları olduğu düşünülsə də, onlardan üçü qardaşlarının uşaqları idi.

“Şəkli paylaşanda hamı elə bilir ki, bizim dörd övladımız var. Amma üçü Raqufun qardaşlarının uşaqlarıdır. Onsuz da onların hamısı Raqufun övladları kimi idi”.

Sevinc Orucovanın sözlərinə görə, ailə Raquf Orucovu martın 23-də son dəfə görüb. Təxminən bir həftə sonra isə Aprel döyüşləri başlayıb.

“Son dəfə onu elə həmin gün gördük. Ondan sonra bir daha Raqufu görə bilmədik. Təxminən bir həftə sonra, martın 31-dən aprelin 1-nə keçən gecə Aprel döyüşləri başladı”.

Raquf Orucov 1972-ci il iyulun 12-də Ağdam rayonunun Cinli kəndində anadan olub. Birinci Qarabağ müharibəsi illərində onun ailəsi ağır itkilərlə üzləşib. Dayısı Azər Rəhimov döyüşlərdə, anası Raya xanım isə 1993-cü ildə Cinli kəndinin işğalı zamanı şəhid olub.

1994-cü ildə Bakı Ali Hərbi Ümumqoşun Komandirləri Məktəbinə qəbul olunan Raquf Orucov 1996-cı ildə təhsilini başa vuraraq zabit kimi xidmətə başlayıb. Ön cəbhədə xidmət etməyə üstünlük verən gənc zabit Murovdağa təyinat alıb və kəşfiyyat bölüyünün komandiri kimi fəaliyyət göstərib. Polkovnik-leytenant Raquf Orucov 2016-cı ilin Aprel döyüşlərində şəhid olub. Aprelin 5-də Sumqayıt Şəhidlər xiyabanında dəfn edilib.

Raquf Orucov 1995-ci ildə “Hərbi xidmətdə fərqlənməyə görə” III dərəcəli, 1998-ci ildə “Hərbi xidmətlərə görə”, 2003-cü ildə “Qüsursuz xidmətə görə” III dərəcəli, 2008-ci ildə “Azərbaycan Silahlı Qüvvələrinin 90 illiyi” yubiley və “Qüsursuz xidmətə görə” II dərəcəli, 2013-cü ildə “Azərbaycan Silahlı Qüvvələrinin 95 illiyi” yubiley və “Qüsursuz xidmətə görə” I dərəcəli medallarla təltif edilib. O, 2016-cı ildə ölümündən sonra “İgidliyə görə” medalı ilə təltif olunub.

Raquf Orucov 1999-cu ildə Sevinc Alızadə ilə ailə həyatı qurub. Onların Aqşin və Nihad adlı iki oğlu dünyaya gəlib.