Ali məktəblərə qəbul imtahlarında yüksək nəticə əldə etmiş tələbələrlə görüş keçirilmişdir.
2026/2027-ci tədris ili üçün yüksək bal toplayaraq ali məktəblərə qəbul olunmuş tələbələr, bununla yanaşı uzun illər səmərəli pedaqoji fəaliyyət göstərmiş məktəb direktorları və hazırda çalışan ümumtəhsil müəssisələrinin rəhbərləri ilə 04.09.2026-cı il tarixdə Bakı şəhəri, Nərimanov rayonunda Laçın Rayon İcra Hakimiyyəti başçısı Aqil Nəzərlinin görüşü təşkil edilmişdir.
Görüşdə ali məktəblərə qəbul imtahanlarında yüksək nəticə göstərərək tələbə adını qazanan 32 gənc, ictimai fəaliyyətinə və təhsil sahəsində uzunmüddətli xidmətlərinə görə təqaüdə çıxmış 6 məktəb direktoru, eləcə də hazırda fəaliyyət göstərən 11 nəfər məktəb direktoru iştirak etmişlər.
Tədbirdə Laçın Rayon İcra Hakimiyyətinin başçısı Aqil Nəzərli, Laçın Rayon İcra Hakimiyyəti başçısı Aparatının məsul işiləri, Şərqi Zəngəzur Regional Təhsil İdarəsinin Laçın Rayonu üzrə Sektorunun müdiri Nicat Həsənov, Azad Təhsil İşçiləri Həmkalar İttifaqının Laçın Rayon Komitəsinin sədri Pərviz Xaspoladlı və sektorun əməkdaşları iştirak ediblər.
Görüşdə Laçın Rayon İcra Hakimiyyətinin başçsı Aqil Nəzərli bütün tələbələri, o cümlədən yüksək nəticə göstərərək ali məktəblərə qəbul olanları təbrik etmiş, onlara təhsil dövründə və gələcək həyatlarında yeni-yeni uğurlar arzulamışdır. Rayon rəhbəri qeyd etmişdir ki, cari ildə Laçın rayonu üzrə 502 nəfərin ali təhsil müəssisələrinə qəbil olması, 32 nəfərin isə 600-dən çox bal əldə etməsi Laçın rayonunda təhsilə göstərilən diqqət və qayğının, müəllimlərin fədakar əməyinin və şagirdlərin məqsədyönlü hazırlığının mühüm göstəricisidir.
Daha sonra uzun illər təhsil sahəsində fəaliyyət göstərmiş, məktəblərin inkişafına və ictimai həyata verdikləri töhfələrlə seçilmiş təqaüdçü məktəb direktorlarının xidmətləri yüksək qiymətləndirilmişdir. Hazırda fəaliyyət göstərən məktəb direktorlarının da təhsil sahəsindəki səmərəli fəaliyyətləri və rayonun təhsil göstəricilərinin yüksəldilməsinə verdikləri töhfələr xüsusilə qeyd olunmuşdur.
Görüşün sonunda yüksək bal toplayaraq ali məktəblərə qəbul olunmuş 32 tələbənin, ictimai fəaliyyətinə görə təqaüdə çıxmış 6 sabiq məktəb direktorunun və hazırda fəaliyyət göstərən 11 məktəb direktorunun hər biri Laçın Rayon İcra Hakimiyyətinin Fəxri Fərmanları ilə və qiymətli hədiyyələrlə təltif edilmişlər.
Tədbir iştirakçıları onlara göstərilən diqqət və qayğıya görə Ölkə Prezidenti cənab İlham Əliyevə və Birinci vitse-prezident Mehriban xanım Əliyevaya dərin minnətdarlıqlarını bildirmişlər.