QARABAĞ QAZİSİ PREZİDENTƏ MÜRACİƏT ETDİ – PROBLEMİNİN HƏLLİNİ XAHİŞ ETDİ.


Ağdamda yaşayan qazinin müraciəti: “İş qurmaq istəyirəm, amma yer verilmir”.

İkinci Qarabağ müharibəsi iştirakçısı, III qrup əlil Qasım Paşazadə özünüməşğulluğunu təmin etmək məqsədilə Ağdam rayonunda kafe fəaliyyəti ilə məşğul olmaq istəyir. Lakin onun sözlərinə görə, bu məqsədlə uyğun torpaq sahəsinin ayrılması məsələsi hələ də həllini tapmayıb.

Qasım Paşazadə 2025-ci ildən Ağdamın Kəngərli kəndində yaşayır. O, “Kanal15 Tv.com”a açıqlamasında bildirib ki, aylıq 963 manat pensiya ilə dolanır və ailəsinin əsas maddi təminatını da özü həyata keçirir.
Qazinin bildirdiyinə görə, ailəsində ciddi sağlamlıq problemləri yaşayan şəxslər də var. Onun atası onkoloji xəstəlikdən, anası isə ürək xəstəliyindən müalicə olunur.

Paşazadə kafe açmaq üçün torpaq sahəsinin ayrılması ilə bağlı Ağdam, Füzuli və Xocavənd rayonlarında Prezidentin xüsusi nümayəndəsi Emin Hüseynova müraciət etdiyini söyləyib.
Onun sözlərinə əsasən, müraciətlərdən sonra obyektin inşası ilə bağlı 300 min manatlıq layihə hazırlanıb. Lakin layihənin reallaşdırılması üçün ilk növbədə uyğun ərazinin müəyyənləşdirilməsinə ehtiyac var.

Qazi hesab edir ki, ona iş qurmaq imkanı yaradılarsa, həm ailəsinin maddi vəziyyətini yaxşılaşdıra, həm də özünüməşğulluğunu təmin edə bilər.

Məsələ ilə bağlı aidiyyəti qurumların mövqeyini təqdim etməyə hazırıq.