Bəzən sağlamlığında problem olan şəxslər həqiqi hərbi xidmətə cəlb edilir. Bu barədə məlumat İnsan Hüquqları üzrə Müvəkkilin (Ombudsmanın) 2024-cü il üzrə məruzəsində öz əksini tapıb.

Bildirilir ki, belə şəxslərin hərbi xidmətə cəlb edilməsi onların sağlamlıq və mənəvi-psixoloji vəziyyətinə ciddi təsir etməklə yanaşı, nəticə etibarilə onların komandir heyəti tərəfindən döyüş hazırlığı ilə bağlı olmayan işlərə cəlb olunmasına, habelə müayinə və müalicələrinin təşkili üçün hərbi büdcədən əlavə vəsait xərcinə səbəb olur.

Milli Məclisin deputatı Aydın Mirzəzadə bildirib ki, bu istiqamətdə həm qanunvericilikdə, həm də praktiki faəliyyətdə xeyli işlər görülür:


“Həkim-ekspert komissiyalarının fəaliyyəti gücləndirilir. Daha professional, ayrı-ayrı xəstəliklər üzrə tanınan həkimlər cəlb edilir. Digər tərəfdən əgər çağırışçı, yaxud valideyni gəncin tam sağlam olması barədə qərarla razılaşmırsa, onda Səfərbərlik və Hərbi Xidmətə Çağırış üzrə Dövlət Xidmətinə müraciət edə bilər. Həmçinin belə hallarda çağırışçı yaxud dövlət orqanlarına yaxud millət vəkilinə müraciət edə bilərlər. Bu yolla məsələnin daha da dəqiqliklə araşdırılması, hərbi xidmətə yararlı olub-olmaması barədə dəqiq informasiya alınması təmin edilə bilər”.

Millət vəkili qeyd edib ki, eyni zamanda burada ictimai nəzarət də olmalıdır:

“Belə hallar varsa, mütləq ictimailəşdirilməlidir. Düzdür, bu situasiyadan sui-istifadə edənlər də ola bilər. Övladının xəstə olduğunu iddia edərək onu hərbi xidmətdən yayındırmağa çalışanlar da ola bilər. Amma bununla belə komissiyaların şəffaf işləməsi və buna dövlət orqanlarının diqqət etməsi belə halların qarşısının alınmasına gətirib çıxara bilər”.