Məlum olduğu kimi, Ermənistanda iyul ayının 15-dən 24-nə kimi “Eagle2024” Ermənistan-ABŞ birgə hərbi təlimləri başlayıb. Təlimlərdə Ermənistan Silahlı Qüvvələrinin sülhməramlı briqadasının, ABŞ-nin Avropa və Afrikadakı dislokasiya olunmuş quru qoşunları və Kanzas Milli Qvardiyasının hərbçiləri iştirak edirlər. Rəsmi İrəvan birgə təlimlərin əsas məqsədinin beynəlxalq sülhməramlı missiyalarda iştirak edən bölmələr arasında koordinasiyanın səviyyəsinin yüksəldilməsi, idarəetmə və kommunikasiya sahəsində təcrübə mübadiləsi, o cümlədən Ermənistan hərbçilərinin döyüş hazırlığının artırılmasıdır.Mövzu ilə bağlı Dovletxeberlerinə açıqlama verən Milli Məclisin deputatı Arzu Nağıyev deyib ki, məsələyə hərtərəfli baxanda təlimlərin məramının, məqsədinin nədən ibarət olduğu açıq şəkildə görünür: “Nəyin bahasına olursa-olsun Ermənistan ərazisindəki Rusiya bazasının nüfuzunu aşağı salmaq, eyni zamanda dünyaya göstərmək ki, erməni ordusu Kollektiv Təhlükəsizlik Müqaviləsi Təşkilatından çıxdıqdan sonra məhz ABŞ ordusu və Qərbin bir sıra aparıcı dövlətlərinin orduları ilə birgə təlimlərə başlayır. Bu da guya ki, ordudakı islahatlarla bağlıdır. Əsas məqsədləri isə geosiyasi layihələrin həyata keçirilməsi üçün Ermənistanda bir paltformanın, plasdarmın yaradılmasıdır. Bu isə Cənubi Qafqazda sülhün bərqərar olmasına ziyan gətirə bilən başlıca addımlardan biri kimi dəyərləndirilməlidir. Baş verənlər təbii ki, ilk növbədə Rusiyanın, İranın əleyhinədir. Bu, region dövlətlərinin təhlükəsizliyinə təhdid də ola bilər. Rusiya müəyyən bəyanatlar verərək, öz münasibətini bildirib. Azərbaycan bunların hamısını təhlil edərək özü üçün nəticə çıxarıb ki, bu cür təhlükə olsa belə, Azərbaycanın öz daxili və xarici siyasəti var, suverenliyini və ərazi bütövlüyünü qorumaq üçün hər cür imkalara da malikdir. Bu əsas məqamlardan biridir”.

Deputat deyib ki, son vaxtlar istər Fransa, istər Hindistandan Ermənistana silah tədarükü müharibə ocağını yenidən körükləmək kimi başa düşülməlidir: “Qərb odla oynayır, heç cürə razılaşa bilmir ki, Azərbaycan və Ermənistan arasında sülh müqaviləsinin imzalanması məhz iki dövlətin iştirakı ilə həyata keçirilə bilər. Buna görə də onlar öz varlıqlarını məhz belə yollarla göstərməyə çalışırlar.Bu təlim Azərbaycan üçün o qədər ciddi təhdid deyil, lakin belə təlimlər dolayı yollarla regionda təhlükəsizlik məsələlərinə ziyan gətirə bilən missiyadır”.

A.Nağıyev söyləyib ki, nə qədər ki, bu ocaqlar var, dünyada sülhün bərqərar olması üçün ən böyük çətinliklər yaranır: “Buna görə hesab edirəm ki, həm ABŞ, həm digərləri düşünməlidirlər ki, bu proses nə ilə bitə bilər. Maraqlı məqam budur ki, İran buna daha çox reaksiya verməldir, çünki ABŞ qüvvələri artıq Ermənistandadır və İranın sərhədləri yaxınlığında təlimlər keçirlər. Bunlar da ciddi məsələlərdir və ciddi siqnaldır”.