Azərbaycanın Milli Qəhrəmanı general-mayor Polad Həşimovun oğlu Davud Həşimov dörd xarici ölkədə yerləşən yeddi universitetdən qəbul olub. Buraya Kanadanın Toronto, ABŞ və digər ölkələrin bir sıra universitetləri daxildir.



Amma Davud Həşimov təhsilini universitetlərin reytinq sıralamasında TOP 100-ə daxil olan ABŞ-nin "Purdue" universitetində kompüter mühəndisliyi üzrə təhsil alacaq.



Onun uşaqlıqdan kompüter sahəsinə marağı olub. Səkkiz-doqquzuncu siniflərdən bu peşəyə yiyələnmək üçün çalışıb.



Dovletxeberleri xəbər verir ki, Davud Həşimov "azedu.az"a müsahibə verib.



- Davud bəy, 8-9-cu siniflərdən etibarən mühəndis olmaq üçün çalışmısınız. Sizi bu sahəyə kim yönləndirib?



- Kiçik yaşlarımdan bəri kompüter sahəsinə marağım olub. Atam da bunu məndə görmüşdü və həmin sahə üzrə təhsil almağıma dəstəyini göstərmişdi. Artıq yuxarı siniflərdə mən bu sahə üzrə hazırlaşmağı düşünürdüm. Bir gün tanıdığım bir kurs mənimlə əlaqə saxladı və mənə xaricdə təhsilə hazırlaşmağa köməklik göstərmək istədiklərini bildirdilər. Beləliklə, dərslərə qoşuldum. İmtahanlara hazırlıqdan əlavə müxtəlif yarışlarda və layihələrdə iştirak edərək sertifikatlar əldə etdim. Bu nəaliyyətlər də mənə xaricdəki universitetlərdən qəbul almağıma kömək oldu. Yəni mən həm öz arzumu, həm də atamın arzusunu reallaşdıra bildim.



- Gələcəkdə magistr təhsili almağı düşünürsünüz? Ən böyük arzunuz nədir?



- Hazırda bütün diqqətimi bakalvr təhsilinə verməyi düşünürəm, çünki qəbul olduğum universitet mənə istədiyim sahədə lazımi bilikləri verəbiləcək tədris proqramına sahibdir. Əlbəttə, gələcəkdə bu sahədə daha da professionallaşmaq üçün magistr təhsili düşünə bilərəm. Çox istəyirəm ki, təhsilimi başa vurduqdan sonra İT sahəsində ölkəmizin inkşafına töhfələr verim, xalqımıza xidmət edim.



- Qəbul olduğunuzu bildiyin an necə hisslər keçirdiniz, sözlə ifadə edə bilərsiniz?



- Təbii ki, sevindim. İlk düşündüyüm o oldu ki, atamın ruhu qarşısında olan borclarımdan birini yerinə yetirmişəm. Bilirəm ki, o bunları hiss edir və ruhu şaddır. Həm də anamın mənim üçün çəkdiyi əziyyətlər də yerdə qalmadı.



- Təhsil aldığınız müddətdə işləməyi düşünürsünüz?



­- Hələlik bu haqda düşünməmişəm, ancaq bildiyim qədərilə bir çox tələbələr təhsil aldıqları müddətdə işləyirlər. Ona görə də təcrübə proqramlarında iştirak edərək bilim və bacarıqlarımı dərinləşdirmək istərdim.



- ABŞ-də qalacağınız yeri təyin etmisiniz?



- Hələlik qalacağım yeri təyin etməmişəm.