“Arayik xəbər göndərdi ki, Köçəryanla görüşsəm, Paşinyan məni yeyəcək”
Xəbər verilir ki, Köçəryan İrəvandakı Ermənistan Universitetinin müəllim və tələbə heyətilə görüşündə müharibənin uduzulmasına görə bütün məsuliyyətin Paşinyan iqtidarının üzərində olduğunu vurğulayıb.
O bildirib ki, 2020-ci ilin 44 günlük müharibəsindən sonra Ermənistanda cəmiyyətin qütbləşməsi artıq fantastik həddə çatıb:
“Cəmiyyət qaralara, ağlara, köhnələrə, yenilərə, soyğunçulara və soyğunçu olmayanlara bölünüb və bütün bunlar təkcə siyasi müstəvidə deyil, həm də orduya baş verib”.
Köçəryan Paşinyan iqtidarını ordunu nüfuzdan salmaqda, Silahlı Qüvvələrdə vacib islahatlar aparmamaq ittiham edib.
“2018-ci ildə hakimiyyətə gələndən sonra generalları qorxutmağa başladılar. İctimai şüurda generallar ordunu qarət edən, ordu ilə heç bir əlaqəsi olmayan təbəqə kimi qəbul olundu. İndi hərbi keçmişi olan generallar ictimai yerlərdə daha çox mülki geyimdə görünməyə üstünlük verirlər. Əvvəllər hərbi forma qürur mənbəyi idisə, indi generallar bu geyimdə gizlənməyə çalışırlar”, - eks-prezident qeyd edib.
"Müharibə başlayandan üç gün sonra Qarabağda idim. İki həftə Qarabağda qaldım. Qarabağda olduğum üçüncü gündə həm Bako Saakyandan, həm də Arkadi Qukasyandan Arayik Arutyunyanla görüş təşkil etməyi xahiş etdim. Mənim əsas mesajım müharibəni dayandırmaq üçün mümkün olan hər şeyi etmək idi, çünki müharibənin hər günü bizə daha çox problem gətirirdi. Lakin Arayik Arutyunyan mənə belə bir xəbər göndərdi: “Əgər Köçəryanla görüşsəm, Paşinyan məni yeyəcək”. Bako Saakyan bunu mənə sözbəsöz çatdırdı: “Nəticədə biz Qarabağda əldə etdiklərimizi aldıq”, - deyə Köçəryan vurğulayıb.
Robert Köçəryan Serj Sarkisyan iqtidarını da suçlamağı unutmayıb. Deyib ki, 2016-cı ildə baş verən 4 günlük Aprel müharibəsindən çox ciddi nəticələr çıxarmaq lazım idi:
“Biz Su-30-ları selfi üçün almamışdıq, zenit sistemlərinə ehtiyacımız var idi, hava hücumundan müdafiəyə çox ciddi sərmayələr lazım idi, amma bunlar, edilmədi. 2016-cı ildəki müharibə maraqlı idi, çünki bu, çox qısa olsa da, tendensiyanı əvvəlcədən müəyyənləşdirdi və biz ondan mahiyyətcə heç bir nəticə çıxarmadıq: bu müddət ərzində biz Azərbaycana nəinki demək olar ki, bütün kəmiyyət göstəricilərində güzəştə getməyə başladıq, həm də təhlükəsizliklə bağlı məsələlərdə kəskin şəkildə uduzduq”.
