Cənubi Qafqaz ölkələri sırasında bu gün yalnız Ermənistanda xarici ölkələrin hərbi bazaları mövcuddur. Belə ki, burada Rusiyanın hərbi bazası və Avropa İttifaqının Müşahidə Missiyası fəaliyyət göstərir. Ümumiyyətlə, regiondan üçüncü qüvvələrin qoşunlarının çıxarılması məsələsinin gündəmə gətirilməli olduğunu düşünənlər var. Ermənistandakı həm Rusiya bazası, həm də Avropa müşahidəçilərinin çıxarılmasının zəruri əhəmiyyət daşıdığı qeyd olunur.

"Rusiya hərbi bazasının Ermənistanda olması həmin iki ölkə arasında olan münasibətdir"

Milli Məclisin Müdafiə, təhlükəsizlik və korrupsiya ilə mübarizə komitəsinin üzvü Aydın Mirzəzadə Modern.az-a açıqlamasında bildirib ki, Azərbaycan bir qayda olaraq özünün milli maraqlarına zərər vuracaq faktorlara diqqət yetirir:

"Rusiya hərbi bazasının Ermənistanda olması həmin iki ölkə arasında olan münasibətdir. Hələ ki həmin qoşunların Azərbaycana qarşı hər hansı təhdidi barədə bir informasiya və fakt ortaya çıxmayıb. Bu iki ölkə öz münasibətlərini özləri həll etməlidirlər. Rusiya ilə Azərbaycan strateji müttəfiqlərdir və müttəfiqlik ilk növbədə təhlükəsizlik və bir-birinin müstəqilliyinə hörmətlə yanaşmağı nəzərdə tutur".



"Avropa İttifaqının Ermənistandakı müşahidə missiyası narahatlıq yaratmaqdadır"

Deputat qeyd edib ki, Ermənistan ərazisində yerləşən Avropa İttifaqının müşahidəçiləri, əlbəttə, Azərbaycan üçün narahatlıq doğuran faktordur:

"Azərbaycan və Ermənistan sülh müqaviləsinin mətnini hazırlayıblar. Onun imzalanması üçün müəyyən işlər görüldükdən sonra məsələ həll olunacaq. Nə səbəbdən yüzlərlə nümayəndə Avropa büdcəsi hesabına Ermənistan sərhəddindən Azərbaycan ərazilərini izləməkdə davam edirlər? Onları Azərbaycan ərazisində nəsə maraqlandırırsa, qoy, sivil qaydada vizamızı alsınlar, gəlib Azərbaycan ərazisində müşahidə etdiklərini gözləri ilə görsünlər. Hesab edirəm ki, bu gün həmin missiyanın fəaliyyəti artıqdandır və Azərbaycan-Ermənistan müasibətlərinin normallaşmasına çox ciddi mane olur. Bu, əlbəttə, diqqətdən kənarda qala bilməz".

A.Mirzəzadə söyləyib ki, Fransa radioaktiv tullantılarını Ermənistanda Azərbaycan sərhədlərinə yaxın yerdə basdırıb:

"Bu günlərdə məlumat çıxdı ki, Fransa özünün radioaktiv tullantılarını Ermənistanın Azərbaycanla şərti sərhədi yaxınlığında basdırıb. Bu, əlbəttə, Azərbaycan üçün təhlükədir. Nə dərəcədə onun təhlükəsizliyinə təminat veriləcək, bu, sual altındadır. Bu tullantılar niyə Fransada yox, Azərbaycana yaxın ərazilərdə basdırılıb? Sabah həmin tullantılar sızıntı verəcək, yeraltı sularla Azərbaycana gələcək. Bu, vətəndaşlarımızın sağlamlığı və Azərbaycan üçün ciddi problemdir. Hesab edirəm ki, beynəlxalq təşkilatlar, regiondan kənardakı ölkələr belə məsələlərdə buradakı ölkələrin suverenliyini, atdıqları addımların onlara nə dərəcədə təsir edəcəyini nəzərə almalıdırlar".