Zəfərin təqvimi – 8 noyabr!
Noyabrın səkkizi... Bu gözəl tarixi gün, bütün Azərbaycan üçün təqvimin ən şanlı günü və otuz ilə yaxın həsrətində olduğumuz Zəfərin nişanəsidir. Bu, bizim üçün çətin, amma şərəfli bir yolun sonunda əldə olunmuş tarixi nailiyyətdir. Prezident, Müzəffər Ali Baş Komandan İlham Əliyevin rəhbərliyində qalib Azərbaycan Ordusu düşməndən fərqli olaraq beynəlxalq ictimaiyyətə ədalət dərsi verərək BMT Təhlükəsizlik Şurasının dörd qətnaməsinin təkbaşına icra edilməsinin mümkünlüyünü bütün dünyaya sübut etdi. Ərazilərimiz işğaldan azad olunduqca o şanlı günlər də Zəfər tariximizə bir-bir yazıldı. Bu, uzun və mürəkkəb bir yolun gözlənilən təbii nəticəsi idi.
2020-ci il noyabrın 8-də Müzəffər Ali Baş Komandan İlham Əliyevin rəhbərliyi ilə şanlı Azərbaycan Ordusu Türk və İslam dünyası üçün böyük əhəmiyyətə malik Şuşa şəhərini erməni işğalçılarından azad etdi. Dünyanın hərb tarixinə düşən və xarici ölkələrin hərbi akademiyalarında tədris edilə biləcək səviyyədə olan Şuşa əməliyyatı 44 günlük Vətən müharibəsində dönüş nöqtəsi oldu. Şuşanın azad edilməsindən iki gün sonra - noyabrın 10-da Ermənistan kapitulyasiya aktı imzaladı. Ağdam, Kəlbəcər və Laçın rayonları Azərbaycana döyüşsüz qaytarıldı. 44 gün davam edən Vətən müharibəsi Azərbaycan tarixinə qızıl hərflərlə yazıldı. Otuz ilə yaxın bir dövr ərzində işğal altında saxlanılan ölkənin 20 faiz ərazisi Prezident-xalq-ordu birliyi nəticəsində azad olunması Azərbaycan tarixi üçün misilsiz nailiyyət oldu. Məhz Şuşa əməliyyatının uğurlu nəticəsidir ki, bu gün Azərbaycanın Dövlət Bayrağı təkcə Şuşada, Ağdamda, Laçında deyil, Xankəndidə, Xocalıda – bütün ərazilərimizdə dalğalanır.
İşğal altında olmuş torpaqlarımızın azad edilməsi bütün dövrlərdə dövlət siyasətinin mütləq prioriteti və strateji hədəfi olub. Azərbaycan zaman-zaman torpaqlarının itirilməsinə, xalqımız soyqırımları, deportasiyalara məruz qalıb. Bütün bunlara baxmayaraq, beynəlxalq təşkilatlar, xüsusilə BMT ölkəmizə qarşı bu cür ədalətsizliklərə heç vaxt adekvat reaksiya verməyib. BMT Təhlükəsizlik Şurasının ölkəmizin işğal olunmuş əraziləri ilə bağlı qəbul etdiyi qətnamələr isə kağız üzərində qalmış, işğalçıya qarşı heç bir ciddi tədbir görülməmişdir. Belə olan halda, təbii ki, Azərbaycan öz məsələsini özü həll etmək məcburiyyətində qaldı.
Aprel döyüşləri, Günnüt əməliyyatı, Tovuz döyüşləri və digər tədbirlər artıq Azərbaycanın böyük Qələbəyə doğru irəlilədiyini göstərirdi. Beləliklə, 2020-ci ilin sentyabrında başlayan və 44 gün davam edən hərbi əməliyyatlar Azərbaycanın böyük Qələbəsi ilə nəticələndi. Bu, təkcə hərbi zəfər deyil, eyni zamanda, ədalətsizlik üzərində qələbədir, Azərbaycan xalqının əyilməz ruhunun təntənəsidir.
Daha bir önəmli məqama diqqət yetirək. Azərbaycanla hərbi ritorika ilə danışan erməni cinayətkarlar 44 gündə məğlubiyyətə uğradıldı. Məhz Paşinyanın yalvarışlarına görə, noyabrın 10-da üçtərəfli Bəyanat imzalanaraq münaqişənin həll olunması üçün atəşkəs elan edildi, digər məsələlərin siyasi yollarla həllinə qərar verildi. Beləliklə, kapitulyasiya nəticəsində Ağdam, Kəlbəcər və Laçın rayonları Ermənistan tərəfindən boşaldılsa da, öz xislətini növbəti dəfə nümayiş etdirən rəsmi İrəvan bir müddət sonra üçtərəfli Bəyanata əməl etmədi. Buna görə də biz öz gücümüzlə bu bəyanatın müddəalarını Ermənistana icra etdirməyə məcbur olduq. Belə ki, 2023-cü il sentyabrın 20-də keçirilən lokal xarakterli antiterror tədbirləri ilə Qarabağda erməni separatizminin kökü kəsildi. Bakıda çay içmək arzusunda olan separatçıların rəhbərləri “arzularına” çatdı və bu gün DTX-nin təcridxanasında çay içirlər. Bakıda tankların hərəkət edəcəyini arzulayan Ermənistan rəhbərliyinin də arzusunu yerinə yetirdik və döyüş meydanında qənimət olaraq götürülmüş erməni tankları və döyüş texnikaları Zəfər paradımızda nümayiş olundu. Beləliklə, rəşadətli Ordumuz və xalqımız “dəmir yumruğ”a çevrilərək 200 illik arzunu reallaşdırdı.
Digər baxımdan, döyüş meydanında qazanılan Qələbənin diplomatiya müstəvisində davam etdirilməsi uzun illərdir həyata keçirilmiş uğurlu xarici siyasətin məntiqi nəticəsidir. Azərbaycan Respublikası balanslı xarici siyasət prioritetlərinə uyğun olaraq heç bir hərbi-siyasi bloklaşmada təmsil olunmur. Qoşulmama Hərəkatına üzvlüyümüz bu mövqeyi daha aydın şəkildə ifadə etməklə yanaşı, beynəlxalq əlaqələrin çoxtərəflilik prinsipi əsasında formalaşdırılması üçün mühüm platforma yaratmış oldu.
Xüsusilə də 44 günlük Vətən müharibəsi dövründə bu Hərəkata üzv olan ölkələrin Azərbaycanın ərazi bütövlüyünə və suverenliyinə münasibətdə verdikləri dəstək istisnasız olaraq qeyd edilməlidir. Azərbaycan Türk və İslam dünyasının aparıcı dövlətlərindən biri olmaqla yanaşı, Qərb üçün də önəmli enerji tərəfdaşıdır. Eləcə də Azərbaycan müasirliyin və ənənəviliyin vəhdətini təcəssüm etdirən bir dövlət olaraq sivilizasiyalar arasında mühüm körpü rolunu oynayır. Belə bir şəraitdə Azərbaycanın ərazi bütövlüyünün bərpa edilməsi istiqamətində atdığı addımlar təbii ki, dost və strateji tərəfdaş olan dövlətlər tərəfindən də birmənalı şəkildə dəstəklənir.
Bəli, artıq Azərbaycan xalqı dördüncü ildir ki, Zəfər Gününü qeyd edir. Zəfər Günü Azərbaycan tarixinin ən şərəfli səhifəsidir. Bu gün Azərbaycan xalqı Ali Baş Komandan və qəhrəman ordumuzun sayəsində dördüncü ildir ki, Zəfər bayramını qeyd edir. Bu gün Azərbaycan 21-ci əsrin tək qalib ölkəsidir. Ermənistan isə iki dəfə kapitulyasiya aktını imzalamış fərari orduya malik ölkədir. Bu gün bütün dünya Azərbaycan xalqının nəyə qadir olduğunu, Azərbaycan ordusunun qəhrəmanlıq salnaməsinin şahididir. Azərbaycan işğalçı ölkə üzərində tarixi zəfər qazanmaqla adını qalib ölkələr sırasına yazdırdı. Zəfər Günü bundan sonra da Azərbaycan tarixində misilsiz bir qələbənin simvolu olaraq daim qeyd ediləcək. Zəfər günün mübarək Azərbaycan! Həbib Misirov YAP Kəlbəcər rayon təşkilatının sədri
