6-7 iyun tarixlərində Azərbaycanda İslam dininin əsas bayramlarından olan Qurban bayramı qeyd ediləcək.

Qurban bayramına insanlar xüsusi diqqət göstərirlər. Hətta kreditlə qurbanlıq dana, qoç alanlara, qurban kəsənlərə rast gəlinir.

Açıqlamasında Qafqaz Müsəlmanları İdarəsinin sədr müavini Bəxtiyar Nəcəfov bildirib ki, Qurban kəsmək Məkkədə - Həcc ziyarətində olan şəxslərə vacibdir:

"Zilhiccə ayının 10-cu günü Məkkədə olanlara qurban kəsmək vacibdir. Amma evində, yerində qurban kəsmək müstəhəb əməldir. 7-8 nəfər birləşərək dana alıb kəsə bilərlər. Bu, mümkündür. Kredit götürərək qurban kəsmək o qədər də vacib deyil. İnsan özünü niyə çətinliyə salmalıdır? İnsanlar belə bir şey etməsinlər. Bu, onlara vacib əməl deyil.

"Hazırda Məkkə şəhərində olan azərbaycanlı zəvvarlar hansı dini ayinləri icra edirlər? Zəvvarlarımız arasında isti hava şəraiti ilə əlaqədar olaraq xəstələnənlər, günvurmaya məruz qalanlar varmı?"

Bu suallarımıza cavabında QMİ sədrinin müavini Bəxtiyar Nəcəfov deyib:

"Zəvvarlarımız birinci mərhələni, Ümrə əməllərini yerinə yetiriblər. Allah qoysa, ayın 4-ü zəvvarlarımız Böyük Həcc ziyarətinin yerinə yetirilməsi üçün Ərafat çölünə yola düşəcəklər".

B.Nəcəfov vurğulayıb ki, azərbaycanlı zəvvarlar arasında xəstələnənlər yoxdur:

"Belə götürəndə xəstələrimiz yoxdur. Günvurma ilə bağlı müəyyən isti vaxtlarda çölə çıxmağa icazə verilmir. Bütövlükdə hava da çox isti deyil, normaldır. Hər şey qaydasındadır".