Qarabağ uğrunda döyüşdü, indi dolanışıq uğrunda vuruşur

O, vaxtilə səngərdə idi — güllə yağışı altında, torpaq uğrunda, Vətən uğrunda canını ortaya qoydu. Bugün isə başqa bir cəbhədədir — işsizliklə, biganəliklə, laqeyd sistemlə mübarizədə.

Bu gün küçələrimizdə, rayon idarələrinin qarşısında, iş axtaranlar sıralarında Qarabağ qaziləri görünür. Gözlərində qürurla yanaşı, bir sükutun qəzəbi var. Sanki demək istəyirlər: “Biz döyüşdük ki, bu torpaqda ədalət, dəyər, qayğı olsun — amma indi o ədalət bizi görmür.”

Veteran işləmirsə, bu təkcə onun faciəsi deyil — cəmiyyətin, sistemin və vicdanın iflasıdır. Dövlətin borcu təkcə orden, medal verməklə bitmir. Hər bir veteran təminat, iş, hörmət və qayğı görməlidir.

Onları yad etmək, bir gün üçün xatırlamaq asandır. Amma hər gün onların yanında olmaq — bu, həqiqi vətənpərvərlikdir.

Unutmayaq:
Azadlıq qazilərin qanı ilə yazılıb, onların alın tərinin qiymətiylə qorunmalıdır.