Ağcabədi və Şirvan məhkəmələri uzun müddət əsassız iddialarla Kanal 21-in direktoru və təsisçisi Fərhad Bakıroğlunu hədəfə almışdı. Baş redaktorun sözlərinə görə, bu instansiyalarda aparılan prosesdə obyektivlik gözlənilən səviyyədə təmin olunmayıb və qərarlar şəxsi maraqlardan asılı olmuşdur.

Lakin Ali Məhkəmə bütün bu haqsızlıqlara son qoyaraq, Fərhad Bakıroğlunun haqqını tam şəkildə bərpa etdi. Bu qərar sadəcə hüquqi bir prosesin nəticəsi deyil, bu, ədalətin, qanunun və dövlət əxlaqının yüksək səviyyədə təntənəsidir. Qərar bir daha göstərdi ki, Azərbaycan dövləti heç vaxt nahaqqa, haqsızlığa və şəxsi maraqlara xidmət edən iddialara yol vermir.

Baş redaktor uzun müddət təkbaşına mübarizə apararaq öz hüquqlarını müdafiə edib. O, proses boyunca müxtəlif instansiyalarda qarşılaşdığı təsir imkanları, qərəzli qərarlar və uzadılmış prosedurlara baxmayaraq haqqını qorumaqdan vaz keçməyib. Ali Məhkəmənin bu qərarı həm onun şəxsi qələbəsi, həm də Azərbaycan jurnalistikasının qələbəsi hesab olunur.

Fərhad Bakıroğlu ömrünü media sahəsinə həsr etmiş, dövlətinə və xalqına sədaqətlə xidmət etmiş, illərlə minlərlə insana səs olmuş bir jurnalistdir. Onun barəsində əsassız iddianın rədd olunması yalnız hüququn bərpası deyil, həm də milli mətbuatın və jurnalistikanın müdafiəsi deməkdir.

Bu gün bir daha sübut olundu ki, haqq olan yerdə ədalət var, amma bəzən onu təmin etmək üçün ən ali instansiyaya qədər getmək lazım olur. Eyni zamanda bu hadisə yerli məhkəmələrin və bəzi nüfuzlu şəxslərin təsir imkanlarının jurnalistlərin fəaliyyətinə necə mane ola biləcəyini də göstərir.

Qeyd edək ki, məsələ ilə bağlı qarşı tərəfin mövqeyi hələlik açıqlanmamışdır.