Qaradağ rayonunun Səngəçal qəsəbəsində yerləşən şəhid Fəzail Qədimov adına 222 saylı tam orta məktəbdə 31 Dekabr – Dünya Azərbaycanlılarının Həmrəylik Günü münasibətilə yüksək səviyyədə tədbir təşkil olunub.
Məktəbin direktoru Aynur Abdullayevanın təşəbbüsü və təşkilatçılığı ilə keçirilən tədbir milli birlik, həmrəylik və azərbaycançılıq ideyalarının şagirdlərə aşılanması baxımından xüsusi əhəmiyyət daşıyıb. Belə tədbirlərin mütəmadi olaraq keçirilməsi dünyanın müxtəlif ölkələrinə səpələnmiş soydaşlarımızın tarixi Vətən – müstəqil Azərbaycanla mənəvi bağlarının möhkəmləndirilməsinə xidmət edir.
26 dekabr 2025-ci il tarixində baş tutan və “Dünya azərbaycanlılarının uğurları və həmrəyliyi” adlanan tədbir tarix müəllimi Reyhan Qədirovanın peşəkar təşkilatçılığı ilə reallaşıb. Tədbir zamanı dünyanın müxtəlif ölkələrində tanınmış və uğur qazanmış azərbaycanlılar haqqında maraqlı təqdimatlar nümayiş etdirilib, onların nailiyyətləri şagirdlər tərəfindən böyük maraqla qarşılanıb.
Tədbir iştirakçıları qeyd ediblər ki, bu cür maarifləndirici və vətənpərvərlik ruhunda keçirilən tədbirlər gənc nəslin milli-mənəvi dəyərlərə bağlılığının güclənməsində mühüm rol oynayır. Məktəb rəhbərliyinin və müəllim kollektivinin bu istiqamətdə gördüyü işlər təqdirəlayiqdir.