Bakıda ağır cinayət - 17 yaşlı gənc iki zərbə ilə keçmiş dostunu ÖLDÜRDÜ
Məlumata görə, hadisə 26 iyul 2025-ci ildə Hövsanda yerləşən futbol meydançasında baş verib.
Yetkinlik yaşına çatmayan İlkin (adlar şərtidir) qonşuluqda yaşayan Fəridlə aralarında əvvəldən mövcud olan narazılıqların mübahisəsini “aydınlaşdırmaq” üçün onu stadionun kənarına çağırıb. Mübahisə zamanı İlkin onun sol gicgahına iki dəfə yumruq zərbəsi endirib.
Zərbələr nəticəsində Fərid huşunu itirib və daha sonra “Respublika Neyrocərrahiyyə Xəstəxanası”na yerləşdirilib. Həkimlərin səylərinə baxmayaraq, o, baş beyin qansızması nəticəsində həyatını itirib.
Məhkəmədə həm təqsirləndirilən şəxs, həm şahidlər, həm də mərhumun ailə üzvləri ifadə verib.
Fəridin atası bildirib ki, hadisədən bir qədər sonra oğlu evə qayıdıb, başında şiş olub və “İlkinlə dalaşdım” deyib. Qısa müddət sonra vəziyyəti pisləşib və həkimlər onun beyninin artıq fəaliyyətini itirdiyini bildiriblər.
Şahidlər ifadələrində gənclərin əvvəl dost olduqlarını, lakin sonradan “qız söhbətinə görə” aralarında gərginlik yarandığını qeyd ediblər. İlkin hadisədən sonra həbs olunub və məhkəmədə təqsirini etiraf edərək peşmançılıq bildirib.
Məhkəmənin qərarına əsasən, 2008-ci il təvəllüdlü təqsirləndirilən şəxs Azərbaycan Respublikası Cinayət Məcəlləsinin 126.3-cü maddəsi (qəsdən sağlamlığa ağır zərər vurma, ehtiyatsızlıqdan ölümə səbəb olma) ilə 9 il müddətinə azadlıqdan məhrum edilib.
Hökmə əsasən, təqsirləndirilən şəxsin yaşı nəzərə alınaraq o, cəzasını ümumi rejimli tərbiyə müəssisəsində çəkəcək.
