Qazi Birinci vitse-prezident Mehriban Əliyevaya müraciət etdi.

Döyüş tapşırığını yerinə yetirərkən ağır yaralanmış qazi Əhmədov Sahib Qəhrəman oğlu Azərbaycan Respublikasının Birinci vitse-prezidenti Mehriban Əliyevaya rəsmi müraciət ünvanlayıb.
Qazi müraciətində bildirib ki, 27 iyun 2009-cu il tarixində döyüş tapşırığını icra edərkən düşmən tərəfindən açılan atəş nəticəsində ağır güllə yarası alıb. Tibbi sənədlərə əsasən, onurğanın boyun nahiyəsi (C7–Th1 seqmentləri) zədələnib, onurğa beyninin əzilməsi nəticəsində tam iflic (tetraplegiya) yaranıb. Nəticədə hər iki yuxarı və aşağı ətrafların hərəkəti tam məhdudlaşıb, çanaq üzvlərinin funksiyası pozulub.
Qeyd edilib ki, Sahib Əhmədova Azərbaycan Respublikasının ərazi bütövlüyünün müdafiəsi ilə əlaqədar olaraq müddətsiz I dərəcəli əlillik dərəcəsi verilib. Hazırda qazi təkərli oturacaqdan istifadə edir və gündəlik həyat fəaliyyəti üçün daimi kənar qulluğa ehtiyac duyur.
Müraciətdə qazinin müalicə və reabilitasiya prosesinin davam etdirilməsi, sağlamlıq vəziyyətinin mümkün qədər yaxşılaşdırılması və həyat şəraitinin yüngülləşdirilməsi üçün dəstək göstərilməsi xahiş olunub.
Sahib Əhmədov ümidvar olduğunu bildirib ki, Birinci vitse-prezidentin göstərəcəyi diqqət və qayğı onun həm mənəvi durumuna, həm də reabilitasiya imkanlarına müsbət təsir göstərəcək.