Ağdamda Uşaq Musiqi Məktəbində özbaşınalıq iddiası – müəllimlər narazıdır

Ağdam rayonu Şəmsi Bayramov adına Uşaq Musiqi Məktəbində ciddi narazılıqlar yaşanır. Məlumata görə, məktəbdə qruplaşma, ayrı-seçkilik və müəllimlərdən pul yığılması hallarına rast gəlinir.

Şikayətçilərin sözlərinə görə, məktəbin direktoru formal olaraq vəzifədə qalsa da, faktiki olaraq idarəetməni müəllim Süsən Nəbiyeva həyata keçirir. Onun istədiyi şəxslərə dərs saatı verdiyi, digərlərini isə kənarda saxladığı iddia olunur.

“Məktəbdə özbaşınalıq hökm sürür. İstədiyi adamlara dərs saatı yazır, kimlərisə isə işsiz qoyur. Hər ay müəllimlərdən pul yığılır. Mən öz gözlərimlə görmüşəm, qulağımla eşitmişəm,” – deyə narazı müəllimlər bildirirlər.

Məktəbin vəziyyətinin də acınacaqlı olduğu vurğulanır. Şikayətdə qeyd olunur ki, tədris binasında sanitar qovşaqlar bağlıdır, internetdən istifadəyə məhdudiyyətlər var, uşaqların normal hərəkəti üçün şərait yoxdur.

“2004-cü ildən bu məktəbdə işləyirəm. Amma son 3 ildə belə özbaşınalıq görməmişəm. Mənim haqqımı yeyirlər, dərs saatımı alırlar. Mən şəhid ailəsiyəm, amma buna baxmayaraq səsimə səs verən yoxdur. Dəfələrlə nazirliyə və regionlara müraciət etmişəm, amma tədbir görülməyib,” – deyə müəllim vurğulayıb.

Müəllimlər aidiyyəti qurumlardan məktəbdə yoxlama aparılmasını, qruplaşmaya və ayrı-seçkiliyə son qoyulmasını tələb edirlər.