Gürcüstanda azərbaycanlı gəncin bıçaqlandığı iddia edilir – Anası hadisənin təfərrüatlarını danışdı.

Gürcüstanda yaşayan azərbaycanlı ailənin iddiasına görə, 15 yaşlı oğulları yaşadığı məhəllədə Azərbaycan dilində danışdığı üçün bıçaqlı hücuma məruz qalıb.

Zərərçəkənin anasının sözlərinə görə, oğlu mağazaya gedərkən iki dostu ilə birlikdə olub. Bu zaman təxminən 55-60 yaşlarında olduğu deyilən bir şəxs onlara yaxınlaşaraq "siz niyə Azərbaycan dilində danışırsınız?" deyə irad bildirib. Qadının iddiasına görə, mübahisə davaya çevrilib. Oğlu əvvəlcə döyülüb, sonra isə həmin şəxsin oğlunun bıçaq gətirərək ona hücum etdiyi bildirilir.
Ananın sözlərinə görə, oğlu qaçmağa çalışsa da, arxasınca gedilərək bir neçə dəfə bıçaqlanıb. O bildirib ki, oğluna arxa, ayaq və ürəyinin alt nahiyəsindən ümumilikdə beş bıçaq zərbəsi endirilib və dalağı zədələnib.

Qadın iddia edir ki, ağır yaralanan oğlu kömək istəmək üçün qonşularından birinə müraciət edib. Onun sözlərinə görə, oğlu həmin şəxsdən anasına və ya təcili tibbi yardıma zəng etməsini xahiş etsə də, kömək ala bilməyib.
Ailənin iddiasına görə, daha sonra hadisə yerindən keçən qohumları yaralını görərək avtomobillə xəstəxanaya çatdırıblar.
Ananın sözlərinə görə, hücum edən şəxs bununla kifayətlənməyərək yenidən kəsici alət gətirməyə çalışıb.

O iddia edir ki, həmin aləti əlindən almağa çalışan qonşulardan biri də əlindən xəsarət alıb.

Hadisə ilə bağlı rəsmi qurumların açıqlaması hələlik yoxdur. Məlumat zərərçəkən tərəfin iddiaları əsasında təqdim olunur.