Azərbaycan Respublikası "Ronahi" Kürd Mədəniyyət Mərkəzinin sədri Zabit Məmmədov öz Facebook hesabında Sərdar Cəlaloğlunun son çıxışları ilə bağlı paylaşım edib.
"Son günlər xarici bir Youtube kanalında yayımlanmış və sonradan Tiktok sosial şəbəkəsində qarşıma çıxan videoçıxışda Sərdar Cəlaloğlunun kürd xalqına qarşı səsləndirdiyi təhqiredici və əsassız fikirlər bizdə ciddi narahatlıq doğurub. Həmin çıxışda işlədilən ifadələr məndə və çoxsaylı icma üzvlərində ciddi narahatlıq və dərin təəssüf hissi doğurdu.
Azərbaycan Respublikasının vətəndaşı olaraq hesab edirəm ki, hər hansı xalqın milli kimliyini təhqir edən, etnik zəmində qarşıdurma və nifrət hisslərini gücləndirə biləcək çıxışlar ölkəmizdə illərdir formalaşmış qarşılıqlı hörmət və multikultural dəyərlərlə uzlaşmır. Bu cür bəyanatlar Azərbaycan Respublikasının Prezidenti tərəfindən ardıcıl şəkildə həyata keçirilən multikulturalizm və milli həmrəylik siyasətinin ruhuna uyğun deyil.
Məsələ ilə bağlı aidiyyəti bir neçə dövlət qurumunun nümayəndələri ilə əlaqə saxlamış, narahatlığımı onların diqqətinə çatdırmışam. Hələlik bununla bağlı konkret nəticə barədə mənə məlumat verilməyib. Ümid edirəm ki, məsələ qanunvericiliyin tələblərinə uyğun qaydada obyektiv qiymətləndiriləcək.
Eyni zamanda hesab edirəm ki, cəmiyyətdə milli zəmində qarşıdurma yarada biləcək çıxışların motivləri və mümkün təsirləri barədə yaranan suallar qanun çərçivəsində, obyektiv şəkildə araşdırılmalıdır. Bu, həm ictimai etimadın qorunması, həm də ölkəmizin milli həmrəyliyin möhkəmləndirilməsi baxımından mühüm əhəmiyyət daşıyır.
Mən bütün həmvətənlərimizi təmkinli olmağa, emosional reaksiyalardan çəkinməyə və məsələnin yalnız hüquqi müstəvidə həllinə üstünlük verməyə çağırıram. İnanıram ki, Azərbaycan dövləti bütün vətəndaşlarının hüquq və ləyaqətinin qorunmasına bundan sonra da eyni həssaslıqla yanaşacaq."
