“Apple” sentyabrın 9-da saat 21:00-da keçiriləcək “Surprise and Shine” tədbirində ilk qatlanan “iPhone” modelini göstərə bilər.

Xəbər verilir ki, gözləntilərə görə, kitab kimi açılan cihaz “iPhone Ultra” adlanacaq. “Dbrand” hələ təqdim edilməmiş bu model üçün təxminən 50 qoruyucu örtük satışa çıxarıb. Bu addım telefonun təqdimatının yaxınlaşdığı barədə ehtimalları gücləndirib. Cihaz nümayiş etdirilərsə, bu, yeni baş direktor John Ternus dövründə ilk böyük “iPhone” yeniliyi olacaq.

Şayiələrə görə, “iPhone Ultra” bağlı vəziyyətdə 5,5 düymlük xarici ekrana sahib olacaq. Açıldıqda isə istifadəçini 7,8 düymlük daxili ekran qarşılayacaq. Telefonun qalınlığının 4 millimetrdən bir qədər çox olacağı, açıq və tünd rənglərdə buraxılacağı gözlənilir. Arxa hissədə əsas və ultra geniş bucaqlı 2 kamera yerləşəcək. Telefoto kameranın olacağı gözlənilmir. Hər 2 ekranda ön kamera üçün dairəvi dəlik ola bilər. Nazik gövdəyə görə “Face ID” əvəzinə güc düyməsinə yerləşdirilən “Touch ID” barmaq izi sensorundan istifadə ediləcəyi bildirilir.

“Apple” alüminium və titandan hazırlanan menteşə, eləcə də daxili ekran üçün xüsusi şüşə üzərində çalışıb. Bu həll qat yerində yaranan izi rəqib modellərlə müqayisədə daha az nəzərəçarpan edə bilər. “iOS” böyük ekranda “iPad mini” planşetinə bənzər görünüş təqdim edəcək. İstifadəçilər eyni anda bir neçə tətbiqlə də işləyə biləcəklər. İlkin qiymət hədəfi 1999 dollar (təxminən 3400 manat) idi. Lakin əməli yaddaş (RAM) çatışmazlığına görə qiymətin 2199 dollar (təxminən 3740 manat), hətta 2400 dollar (təxminən 4080 manat) ola biləcəyi gözlənilir. Mürəkkəb istehsal prosesi səbəbindən satış ilin sonuna qala bilər.

Tədbirdə qatlanmayan modellərdən yalnız “iPhone 18 Pro” və “iPhone 18 Pro Max”ın təqdimatı gözlənilir. Onların ekran ölçüləri müvafiq olaraq 6,3 və 6,9 düym olaraq qalacaq. Rəng seçimləri arasında tünd albalı, qara və ya tünd göy, gümüşü və ya tünd boz, həmçinin açıq göy ola bilər. Yeni “A20” çipi kameranın çəkilişləri emal etməsini və süni intellekt (AI) tapşırıqlarını sürətləndirə, eyni zamanda enerji sərfini azalda bilər. “iPhone 18 Pro Max” işığın səviyyəsinə uyğun mexaniki şəkildə açılıb-bağlanan dəyişən diafraqma sistemi əldə edə bilər. Bu sistem zəif işıqda daha parlaq, yaxşı işıqlandırılan şəraitdə isə daha kəskin fotolar çəkməyə kömək edəcək.

“Apple Watch Series 12” modelinin dizaynında ciddi dəyişiklik gözlənilmir. Bununla belə, keramika gövdəli versiya və daha sürətli S seriyalı çip gündəmdədir. “watchOS 27” sistemində “Readiness” tətbiqi, yenilənmiş nəbz sensoru və məşqdən kənar vaxtlarda fasiləsiz nəbz ölçmə funksiyası ola bilər. Sınaq məlumatlarında 128 GB yaddaş seçimi də görünüb, lakin bunun hansı saata aid olduğu bilinmir. “Apple Watch Ultra 4” isə əvvəlki görünüşünü qoruyaraq daha parlaq ekran, daha uzun batareya müddəti və yeni qayışlarla təqdim oluna bilər.

“AirPods 4” modellərinin təqdimatından 2 il keçdiyi üçün tədbirdə “AirPods 5”in də göstəriləcəyi gözlənilir. Əsas yeniliklər daha güclü aktiv səsboğma, yəni ətrafdakı səslərin azaldılması və sağlamlıq funksiyaları ola bilər. Qulaqlıq məşq zamanı nəbzi ölçə, eşitmə cihazı və eşitməni qoruma rejimlərini dəstəkləyə bilər. Yaxın məsafədə yeri daha dəqiq müəyyənləşdirən UWB texnologiyası “Find My” vasitəsilə itirilmiş qulaqlığı tapmağı asanlaşdıracaq. Qulaq kanalına yerləşən silikon ucluqlar isə yenə yalnız “AirPods Pro” modellərində olacaq.

“Apple TV 4K” 2022-ci ildən, “HomePod mini” isə 2020-ci ildən yenilənməyib. Buna görə hər 2 məhsulun yeni versiyasının təqdimatı gözlənilir. TV qurğusu yenilənmiş pult və “Apple”ın hazırladığı 2 oyun idarəedicisi ilə satışa çıxa bilər. Hazırda “Resident Evil 4” və “Death Stranding Director’s Cut” kimi oyunlar üçün “PlayStation” və ya “Xbox” idarəedicisi lazımdır. “HomePod mini” isə yeni rənglərdə və “Siri”nin süni intellekt imkanlarını dəstəkləyən çiplə təqdim oluna bilər.