Bir neçə saatdan sonra ABŞ rəhbəri Donald Trampın təşəbbüsü ilə Azərbaycan və Ermənistan rəhbərlərinin görüşü baş tutacaq. Görüş zamanı tarixi əhəmiyyətə malik sənədlərin imzalanması və mühüm bəyanatların səsləndirilməsi gözlənilir. Artıq öncədən elan olunduğu kimi, Azərbaycan və Ermənistan arasında münasibətlərin normallaşdırılması istiqamətində ciddi addımlar atılacaq.

Görüşdə ABŞ Prezidenti Donald Tramp "Azadlığı Müdafiə Aktı"na 907 saylı düzəlişin icrasının dayandırılması haqqında sənəd imzalayacaq.

Xatırladaq ki, Azərbaycan torpaqlarının Ermənistan tərəfindən işğalının davam etdiyi bir dövrdə ABŞ Konqresi 1992-ci ildə rəsmi Bakının Ermənistana guya "blokada" tətbiq etməsini bəhanə kimi göstərərək Azərbaycana ABŞ-dan dövlət yardımının göstərilməsinə qadağa qoyan qanunu qəbul edib.

Sonrakı dövrlərdə ABŞ prezidentləri 907-ci düzəlişin icrasını müvvəqqəti dayandırsa da, Bayden-Blinken administrasiyası bu ədalətsiz qərarı yenidən qüvvəyə mindirərək, Azərbaycana qarşı təzyiq vasitəsi kimi istifadə etməyə çalışıb.

Mövzu ilə bağlı Milli Məclisin deputatı Azər Allahverənov Modern.az-a açıqlamasında bildirib ki, ABŞ-ın bu prosesdəki rolu xüsusi əhəmiyyət kəsb edir və bu da Vaşinqtonda bugün keçiriləcək görüşdə daha aydın şəkildə özünü göstərəcək.

“Eyni zamanda Azərbaycan-ABŞ münasibətləri də yeni bir mərhələyə qədəm qoyur. İki ölkə arasında bir neçə istiqamətdə strateji tərəfdaşlığın inkişafı üçün ciddi imkanlar yaranıb.

Bu kontekstdə ABŞ artıq 907-ci düzəlişlə bağlı mövqeyini açıqlayıb. Bu gün informasiya məkanında 907-ci düzəlişin ləğvi məsələsi daha geniş müzakirə olunmağa başlayıb. Gözlənilir ki, bu istiqamətdə Donald Tramp tərəfindən rəsmi qərarın verilməsi də mümkündür.

O həmçinin əlavə edib ki, hazırkı mərhələdə Azərbaycan və ABŞ arasında münasibətlər elə bir səviyyəyə çatıb ki, tərəfdaşlığın daha da inkişaf etdirilməsi üçün maneçilik yaradan 907-ci düzəliş artıq ləğv olunmalıdır. Onun sözlərinə görə, gələn müsbət siqnallar da bu düzəlişin ləğv olunacağını deməyə əsas verir.

“Qeyd edək ki, 907-ci düzəliş ABŞ hökumətinin Azərbaycana istənilən formada - iqtisadi, texniki və humanitar sahələrdə birbaşa yardım göstərməsini qadağan edən hüquqi normadır. Bu düzəliş 1990-cı illərin əvvəllərində, birinci Qarabağ müharibəsi dövründə qəbul olunub və uzun illər Azərbaycan-ABŞ münasibətlərinin genişlənməsinə əngəl yaradıb.

Tarixə nəzər saldıqda da görmək mümkündür ki, bəzi hallarda bu düzəlişin tətbiqi müvəqqəti dayandırılıb. Lakin bu, daimi xarakter daşımayıb və istənilən vaxt yenidən qüvvəyə minə bilərdi”.

Son olaraq A.Allahverənov qeyd edib ki, 907-ci düzəliş faktiki olaraq Azərbaycana birbaşa maddi yardımların göstərilməsini qadağan edir və iki ölkə arasında münasibətlərin inkişafına əngəl törədir. Onun ləğv olunması isə strateji baxımdan mühüm əhəmiyyət daşıyır:

“Bu, Azərbaycan-ABŞ münasibətlərinin yeni, daha geniş və səmərəli bir müstəviyə keçidini təmin edəcək.

Paralel olaraq, Azərbaycan və Ermənistan münasibətlərinin normallaşması istiqamətində də ciddi irəliləyişlərin əldə olunması gözlənilir. Əgər bu yeni mərhələyə keçid təmin olunarsa, ABŞ faktoru post-münaqişə dövründə Azərbaycan-Ermənistan münasibətlərinin tənzimlənməsində mühüm rol oynayacaq.

Xüsusilə, Zəngəzur dəhlizinin istismarı məsələsində ABŞ-ın iştirakı birbaşa olacaq. Bu baxımdan, 907-ci düzəlişin ləğvi həm Azərbaycan-ABŞ münasibətləri, həm də Cənubi Qafqazda Azərbaycan-ABŞ-Ermənistan əməkdaşlığı üçün yeni imkanlar açacaq. Bu da, təbii olaraq, müsbət və strateji baxımdan əhəmiyyətli bir hadisə kimi dəyərləndirilə bilər”.