Şəhid övladı TƏBİB rəhbərliyinə müraciət etdi: "Ağdam Rayon Mərkəzi Xəstəxanasında problemlər araşdırılsın"

Ağdam rayon sakini, şəhid övladı və ağır dərəcəli bronxial astma xəstəliyi səbəbindən əlilliyi olan Qurbanov Ülfət Əliqismət oğlu TƏBİB-in İcraçı direktoru Anar Bayramova müraciət ünvanlayıb.
Müraciətdə Ağdam Rayon Mərkəzi Xəstəxanasında vətəndaşlara göstərilən münasibət və dərman təminatı ilə bağlı bir sıra iddialar yer alıb.

Müraciət müəllifinin sözlərinə görə, xəstəxananın baş həkimi Günel xanımın vətəndaşlarla, o cümlədən qazilər, veteranlar və şəhid ailələri ilə davranışı narazılıq doğurur. O bildirir ki, qəbul zamanı vətəndaşlar uzun müddət gözlədilir, onlarla kobud davranıldığı və telefon danışıqlarına üstünlük verildiyi iddia olunur.

Qurbanov Ülfət Əliqismət oğlu həmçinin qeyd edir ki, ağır bronxial astma xəstəsi olduğu üçün hər ay dərman preparatları alır. Onun iddiasına görə, xəstəxananın aptekində dərmanların verilməsi zamanı dəfələrlə süni çətinliklər yaradılıb və məsələ ilə bağlı yuxarı instansiyalara müraciət edəcəyini bildirdikdən sonra dərmanlar təqdim olunub.
Müraciətdə göstərilən faktların araşdırılmasına hazır olduğunu bildirən şəhid övladı, TƏBİB rəhbərliyindən Ağdam Rayon Mərkəzi Xəstəxanasında baş verən iddiaların araşdırılmasını, qanunvericiliyə uyğun tədbirlərin görülməsini və şəxsən qəbul edilməsini xahiş edib.

Xəbərdə yer alan məlumatlar müraciət müəllifinin iddialarını əks etdirir. Adı çəkilən qurum və şəxslərin mövqeyi təqdim olunarsa, dərc edilə bilər.