Ağdamlı xanəndə Aygün Rəhimli Türkiyədə Azərbaycan mədəniyyətini təmsil edir.

Ağdamlı xanəndə, şair və müğənni Aygün Rəhimli artıq 10 ildən çoxdur ki, Türkiyədə yaşayır və bu müddət ərzində Azərbaycan mədəniyyətinin təbliği ilə fəal şəkildə məşğuldur.
Sənət yoluna Azərbaycanda başlayan Aygün Rəhimli 2008–2015-ci illərdə İrs Folklor Ansamblında solist kimi çıxış edib. Daha sonra Türkiyəyə köçərək Qars şəhərində məskunlaşıb və hazırda burada ailəsi ilə yaşayır.
O, Xan Şuşinski adına Musiqi Məktəbini bitirdikdən sonra iki il həmin məktəbdə müəllimə kimi fəaliyyət göstərib. Ardınca Rusiyanın Moskva şəhərində yerləşən 152 nömrəli Azərbaycan TUS məktəbində xormeyster vəzifəsində çalışıb. 2002-ci ildə Azərbaycana qayıdan sənətçi yaradıcılığını daha da genişləndirib.
Bu illər ərzində bəstəkar Məlahət Həmidqızının bəstələrindən ibarət 3 musiqi albomu işıq üzü görüb. Sonrakı mərhələdə isə poeziyaya üz tutan Aygün Rəhimli 5 şeir kitabının müəllifidir.
Hazırda o, Azərbaycanın Türkiyədəki Konsulluğunun təşkil etdiyi rəsmi proqram və konsertlərdə şair və müğənni kimi çıxış edərək Azərbaycanı Türkiyədə layiqincə təmsil edir.